Friday September 3, 2010
Shillong Edition

By Our Sport Reporter

Shillong, Lber : Halor ka khubor kaba la mih ba ka synjuk Hynniewtrep National Youth Movement kaba la pynpaw ia ka jing-sngew khia ka jong ka halor ka jingshah iehnoh khongreng jong ka Stadium kaba don hapoh ka shnong Umbuda, (Nongpoh). Ka Joint Action Committee bad kumjuh ruh ka Nongpoh Sports & Cultural Association ki la wan shakhmat ban pynshai ba ka jingieh ia ka kam ha kane ka stadium ka long ba ki kwah syndon ban tei da kaba heh bad kaban long kum ka jaka ia kilan kaba don lut nadong shadong (sporting complex).

Haba iakren bad u Mawphor hapoh nongbah Shillong ki dkhot ba kynthup ia u bah C.B Syiem (ex CEM) Secretary ka JAC, ryngkat u bah O.P Lyngdoh President nangta u bah M. Lyngdoh Secy ka NS&CA ki la kam ba ka jingpynsangeh ia ka kam ha kane ka stadium ka long ba ka synjuk ka thmu ba kan tei syndon ia ka da kaba kham heh bad kaban ia biang ne iadei dur kat kum kane ka juk kaba mynta bad ia ka kam broh la pyntrei hapoh ka jingpeit jong ka tnat State Sports Council of Meghalaya (SSCM).

Khnang ban nym pynsyrwa ia ka pisa u paidbah, ia ka kam ba dei ban trei la hap ban pynsa-ngeh noh shwa namar ba dang thaw ia ki lad ki lynti ban ioh shuh shuh ka jaka.

Kumba ka long mynta ka jingheh jong ka jaka ba la tei ia kane ka stadium ka long tang kumba 2 acre shiteng ban pynheh shuh shuh pat ia ka la donkam sa kumba hynriew acre eiei ka jaka.

Shuh shuh kine ki dkhot ki la iathuh ba ia ka pisa jong kane ka stadium la dep ban mang ia ka naduh u snem 2002-2003.

Dei naduh b a la dep ban bha ia katei ka pisa ki kam ba la lah ban pyndep haduh kane ka khyllipmat kaba mynta ha kane ka stadium ka kynthup ia ki jaka ban shong paietkai ki paidbah, ka jaka ban khreh ki player, ka kamra naka bynta ka synjuk ne katta ka office room bad nalor katta la lah ban pynbha ruh ia ka madan phutbol kaba haduh mynta la lah ban pyndonkam ne ban ialehkai halor jong ka. Khlem da klet ruh ba la lah ban tei pyndep ruh ia ka jaka ban shong peitkai ki kynram ki lyndan (VIP Rustrum) baroh kine ki kam la lah ban pyndep ia ki la kham slem.

Hadien kane ha shwa ba ka kam kin jam noh sha kaba kut, kynsan ka la wan shat ha ka jingmut jong kine ki dkhot haba ki iohi ba ka don ka lad ka lynti ban kham pynheh ia kane ka stadium ne ban pynwan dur iaka sha katta ka sporting complex. Kumta ki la sdang ban ia thaw pat ia ki lad ki lynti ban ioh shuh shuh ka jaka naka bynta ban pynheh ia kane ka stadium, dei haba la sdang ban wad ia ka jaka ba ia kane ka kam la hap ban pynsangeh noh ia ka bad la nud ban leh kumne ka long namar ba ia kane ka jaka kaba dang donkam sa kumba hynriew acre la sngewthuh ba ka la don hapdeng ka jingiakren ia pynbeit bad wei shsien ba la biang ia ka kam kaba dang sah baroh yn dang iai bteng pat ia ka ha ki sngi kiban sa wan.

 Web Site Designed and Maintained by SSNetCom Pvt. Ltd.