|
Phah dorkhast ka FKJGP sha u DC ban pynjari aiñ kiba pyniap doh um
|
By Our Reporter
Nongstoiñ, Lber: Mynta ka sngi ki nongialam ka Federation of Khasi Jaiñtia & Garo People(FKJGP), West Khasi Hills ki la leit ban iakynduh ia u Deputy Comissioner ha Ophis treikam jong u ha Nongstoiñ ha kaba ki la aiti ruh da ka jingthoh ryngkat ki jingai jingmut ba kyrpang ha kaba utei u heh ka Distrik ba un pynjari noh da ka kyndon aiñ 144Cr.Pc ha baroh kawei ka Distrik ban khanglad ia kito ki riew shimkabu kiba pyniap pathar ia ki doh um ha baroh ki wah da kaba theh da ki dawai bih, siat bom, ker jar, khwai nar bad kiwei kiwei ki jait jingpyniap kiba long be-aiñ.
Ki nongialam ka seng ki la kyntu ruh ia u DC ba un pyntip sha baroh ki Nongsynshar Shnong, ki Nongsynshar Hima ki Seng Samla Shnong, Seng Longkmie bad ki kynhun trei monsngewbha ba kin pynlong ia prokram ai jinghikai kumno ban pynneh pynsah ia ki dohum dohwah namar kitei ki doh um ki dei kawei na ki lad kamai kiba lah ban ai jingmyntoi shibun ia ki paidbah nongshong shnong ha ka Distrik baroh kawei.
Shuh shuh ki nongialam ka seng ki la pynpaw ruh ba lada ki dohkha ba bun jait ki don kyrhai ha ki wah kan khring ruh ia shibun ki briew kiba na shabar ban wan shang kai bad leh kmen leh sngewbha da ka ba wan khwai ha ki por kiba biang. Halor katei ka dorkhast ba ki la aiti ha u Deputy Comissioner ka seng ka la phah kopi ruh sha baroh ki SDO jong ki Civil Sub-division hapoh ka Distrik bad ruh ha u Superitendent jong ka tnad Ri dohkha ha ka distrik.
Ka seng ka la buh ia ka jingmaham kaba tyngeh ia kito ki riew shimkabu ban pyniap pathar ia ki doh um dohwah,ki mrad ki mreng ki sim ki doh bad baroh ki jingthaw ba im baroh bad lada ka seng kan lap ia kiba pynkheiñ kan ym map satia bad kan pynshitom da kaba tyngeh ryngkat ka jingiatreilang bad ki bor pyniaid Distrik.
Copyright mawphor.com
|
