Friday September 3, 2010
Shillong Edition

By Our Reporter

Jowai, Lber : Ka thaiñ Khliehriat Sub-Division, khamtam ha ka thain Sumer Patorship, Elaka Raliang kadei ka thain ym tang ba la jyllei u bar jylla, hynrei kadei ka thain kaba jyllei bha ki kam pyntriem ba har rukom bad kine ki jia baroh na ka daw jong ka jingiaknieh par dewiong hapdeng ki heh spah kiba ia bishni uwei ia uwei pat ha kaba wad ki bor shnong ruh ki la shah ialam bakla ha ki katto katne ki heh spah kiba don la ka kynhun.

Haba uwei u heh spah u ioh thied par dewiong, kiwei pat ki heh spah ki ia bishni noh bad ki la pyrshang ban tynruh ha ki rangbah shnong ne Secretary shnong bad kine ki nongialam shnong ki sa ialam bakla pat sa ia u paidbah haduh ba mih ki kynrum ki kynram da kaba thaw ia ki jingkulmar bad ki kam pyntriem bad ruh ka jingia-pharep kiba har rukom tang ban ioh khanglad ia u riew shimet lane heh spah uba la ioh thied nyngkong ia kano kano ka par dewiong.

Ka jingiaknieh par dewiong hapdeng ka shnong Samasi bad ka shnong Mynthning nangta ka Samasi bad ka shnong Shyrwang, ka Samasi bad ka Pala, shuh shuh Ka Samasi, Larket pyrshah ia ka shnong Khahnar kam pat kut, mynta pat ka la pur sa sha ka shnong Umkyrpong hajuh katei ka thain.

Ka shnong Umkyrpong ruh kumba long kiwei pat ki shnong ha thain Sumer Patorship, kadei ka shnong kaba riewspah bha ha ka liang ki mar pohkhyndew, u dewiong ba Mawshun. Ki paidbah nongshong shnong ki la die ia ki jaka puta jong ki da ka mon sngewbha sha ki katto katne ngut ki riew shimet kiba khaii dewiong. Hynrei tang hadien katto katne por pat kitei ki juh ki rangbah shnong kiba la ai recommendation ki la pyrshang ban kylla ktien bad ialam bakla ia ki paidbah haduh ba la mih ia I kynrum kynram, ka jingbym shongsuk shong sain hapoh ka shnong ka thaw.

Ka daw baroh ka long namar ba ki don kiwei pat ki heh spah kiba ibang ia katei ka juh ka jaka bad haba kim lah shuh ban ioh thied ia ka naba la dep die shawei pat ki la pyrshang pat ban knieh jubor da kaba khanglad ia ki nongthied kiba nyngkong ban pyndonkam ia katei ka jaka kumba la thmu naduh shwa ban thied ia ka.

`Ha shnong Umkyrpong kidon bun phew tylli ki patta la dep die sha ki katto katne ki riew shimet bad ha ka por iadie ia thied ia kitei ki jaka, la iathoh ia tar ha ki rukom kiba biang bad la aiti ruh ia ki dulir bad ki patta sha u nongthied, hynrei ka kynhun heh spah pat ki la tynruh ha ki bor shnong ban khanglad ia ki riew shimet ban sei dewiong lane pyntreikam ia katei ka jaka bad kane ka la wanrah pat sa ia ka jingia maham bad byrngem uwei ia uwei pat haduh ba ka la wanrah ia ka kynrum kynram kaba ktah ia ka shongsuk shongsain.

Ka don ka por ba kitei ki juh ki rangbah shnong kiba la ai recommendation ha kaban iadie ia thied par dewiong, ki la ialam ia u paidbah nongshong shnong shaduh sha office ka JHADC ban pynbor ia katei ka Ophis ban pyndam ia kito ki patta kiba la die bad pynkylla kyrteng. Kila pyrshang ban ialehkai bad ban pynlong kamkai wat ia ka ophis JHADC da kaba pynbor ia katei ka ophis ban pynkylla ia ki kot ki sla ne ki patta tdong tdong khlieh khlieh.

Dang ha une u bnai ba la dep, ka la don ka jingjia kaba lada bakla tiak, la shah siat iap ei wat ha ki pulit tang namar ba ki don ki katto katne ki nongialam shnong kiba la ujor thok sha ki pulit ha Khliehriat. U don uwei u riew shimet uba la thied ia ki katto katne tylli ki jaka ha katei ka shnong, bad ka jia ha kawei ka sngi, utei u riew shimet ha ryngkat ki nongtrei jong u ki la leit hiar sha katei ka shnong ban leit peit ia katei ka jaka bad ban tip tikna ruh ia u pud u sam.

Utei u nongthied u la leit nyngkong eh ban ia kynduh ia u Secretary shnong katei ka shnong, bad baroh arngut u nongthied, u Secretary shnong bad ki nongtrei jong utei u nongthied ki la leit ban jurip ia u pud u sam katei jaka par dewiong kaba la thied na utei hi u Secretary shnong. Hadien ba la dep jurip pud ia kata ka jaka, ki da ia ai khublei iwei ia iwei pat bad ki nongthied ki la leit phai sha shnong, katba utei u Secretary shnong u la leit phai sha iing.

Hynrei mar ba utei u nongthied jaka bad ki nongtrei jong u ki la mih na katei ka shnong la pyntip sha ha Khliehriat da ki nongialam shnong ka Umkyrpong hana ba ki don ki kynhun kieng atiar kiba la rahbor ia u Secretary shnong bad ki pulit ki la hap pynkhreh ban hiar wut sha katei ka shnong ha ryngkat ki suloi bad ki pulit ki la iathuh ba na ka liang u Officer In Charge ha Khliehriat PS u la dep ai order ruh ia ki pulit ban siat beit tang shu lap ia ka kali jong kitei utei u riew shimet ba wan jurip jaka lang bad utei u Secretary shnong.

Donbok ba ki pulit kiba la kieng atiar bha kim shym la lap ia katei ka kali ba shong utei u nongthied par dewiong bad ki nongtrei jong u, hynrei te ym lah ban tip kan jia aiu.

Shuh shuh ha kane ka 1 tarik une u bnai- ki don shi kynhun ki nongtrei bylla kiba la phah da uwei pat u riew shimet uba la thied khyndew par dewiong ha katei ka shnong ki la leit ban tih pud, hynrei ki rangbah nongialam shnong ka Umkyrpong ki la ia mih paidbah ha ryngkat ki suloi, ki dieng bad kiwei kiwei ki tiar ban mana pyrshah ia kitei ki nongbylla ha kaba u trai jaka uba la thied ia katei ka jaka u la bthah noh ia ki ban wan phai noh ioh mih ki jingjia ba sngewsih.

Halor kane ruh ki rangbah nongialam ka shnong ki la ujor kylla ejahar kylla ia ki katto katne na pdeng kitei ki nongbylla kiba la wan tih pud da kaba kynnoh ia ki ba ki la wan ban byrngem ia ki ha shnong.

Hadien kine ki jingjia, ki katto katne ngut ki la thied par dewiong bad jaka khyndew ha katei ka shnong, ki la leit ban kyrpad ia u OC ka Khliehriat ban lum nong da ka jingialang hadpeng jong ki rangbah nongialam shnong ka Umkyrpong ban ia pynbeit halor kane bad kitei ki riew shimet kiba la thied par bad ia kane ka jingialang la buh tarik mynhynin ka sngi 08 tarik, hynrei ki Nongialam shnong na Umkyrpong kim shym la wan satia.

Kane kane ka la pynsuba jur ia kitei ki riew shimet ba utei u OC um shym la shimkhia ia kane bad ki la hap ban ia pynbeit beit namar kane ka dei ka jingjia kaba ktah ia ka shnong suk shongsain la pynbor ia u OC ban khot biang ia ka jingialang. Wat na ka liang ki katto katne ngut ki MDC kiba la wan ban iakren sngewthuh jingmut bad ki shnong Umkyrpong ruh ki la kyntu jur ia u OC ban khot ia ki nongialam shnong ka Umkyrpong ban pynbeit ia kane khang ba kum kitei ki jingjia kim dei ban mih shuh namar ka ktah ia ka suk ka sain u paidbah.

Haba iakren bad u OC ka Khliehriat PS, u ma EK Pala u la iathuh ba la dep ban pynbeit tarik da kumwei pat ban ia pynbeit ia kane ka kynrum kynram hadpeng ka shnong Umkyrpong bad kitei ki riew shimet. Ia kane ka jingialang la buh ba kan long ha ka 15 tarik por 11 baje ei ei mynstep.

Kine ki kynrum kynram ki mih tang na ka daw ka jingia bishni ki katto katne ki heh spah ki bym shym la ioh thied ia kitei ki jaka, ha kaba ki la tynruh ia ki nongialam shnong da kumne kumtai ban ioh klun ei pat ia katei ka jaka sha lade. Ki nongialam shnong pat ki sa ialam bakla pat sa ia u paidbah nongshong shnong haba ka la wanrah ka jingpharep ba bun jait kaba wanrah sa ka jingtieng jingsmiej bad ktah ia ka suk ka sain jong u paidbah. Kiba kum kine ki jingjia kin dang iabteng ha ki thain dewiong ha Sumer Patorship lada ki pulit kim shym la shimkhia ban pynbeit ia kane ka kynrum kynram khlem shah liang sha kano kano ka liang.

 Web Site Designed and Maintained by SSNetCom Pvt. Ltd.