Friday September 3, 2010
Shillong Edition

By Our Reporter

Shillong, Lber: Wat hadien ba ki pulit ka Laitumkhrah Police Station, ki la ioh ia ka ejahar ba la ujor da ka Kong Agnes Kharshiing, President ka Civil Socity Women Organisation (CSWO), ha kaba iadei bad ka jingbym lah jong ka kompani National Self Employment Mission (NSEM) ban pyni ia ki kot ki sla kiba biang ban pynthikna ia ka jinglong bashisha jong ka ban kamai bad pynioh jingmyntoi ia ki paidbah jong ka jylla lyngba ka jingthep pisa ha katei ka tnat kynshew pisa, hynrei ki pulit kim shym la lah satia ban kem iano iano ruh bad khang khyrdep ia katei ka ophis da kaba ai daw pynban halor ka nongrim ba kim shym la ioh ia ki sakhi ki satar kiba biang.

Ki pulit ka nongbah, kiba la poi hakhmat katei ka ophis kim shym la rung satia ha katei ka ophis bad kyntait ban tuklar halor katei ka ujor bad pynpaw ba kim lah ban kem iano iano ruh namar ba kim shym la ioh ia ki sakhi satia kiba biang.

Katkum katei ka ujor, ka CSWO, ka la batai bniah ia ka jingbym lah shaniah namar ka jingbym lah jong u Bah Pio Dkhar ban pyni ia ki kot ki sla kiba biang, kumba u la kam ba katei ka kompani NSEM ka la dep register ha ka ophis jong ka Ministry of Corporate Affairs, New Delhi, hynrei haba ka seng ka la leit wad jingtip halor katei ka jingregister jong katei ka Kompani NSEM, la lap bad pynshai da katei ka tnat Ministry of Corporate Affairs, New Delhi, ba kam ithuh satia ia katei ka kompani, kaba kdew katkum ka shithi ba katei ka tnat ka la phah sha u B.K Dev Verma, Principal Secretary ka Sorkar Jylla ba dei peit ia ka Finance (Economic Affairs) Department.

Ha katei ka ejahar ba ka Seng ka la ujor sha ki pulit, ka la pynpaw ba u Bah Pio Dkhar uba dei shipara trai bad u Bah Methius Dkhar, uba la thok ia ki paidbah ka jylla khamtam ia ki paidbah na ki thaiñ nongkyndong ha ka kyrteng jong ka Kompani kaba u la ai kyrteng ka Parvenunet.Com ia kaba u la phiah na ka kompani kaba la tip kum ka Kyntiewlang Marketing Pvt. Ltd., kaba la shah khang khyrdep noh ha ka seng HNYF bad kem ruh ia u Methius uba la phla ba u la leh ia kane ka kam kamai pisa thok ha ka kyrteng katei ka Kompani hadien ba u la ioh buit na ki kompani bad ki briew kiba na ka jylla.

Ha katei ka ejahar, la kynnoh ruh ba hadien ba la iohi ba u hynmen jong u, u Methius Dkhar u la shah kem, la mih pat sa u Pio Dkhar ban leh biang ia kane kajuh ka kam ha kaba u Pio Dkhar, u la wan ialam ruh ia ki arngut ki bar jylla na ka nongbah Delhi ban leh mynleh kum ki trai jong katei ka Kompani, ia kaba uwei na ki la tip kyrteng kum u Akash Verma, ki dkhot jong ka seng ki ioh ban kem ia ki na Police Bazar ha u bnai Nohprah 2009 bad tohkit ia kitei ki arngut ha kaba la lap ba kim don satia ia ki kot ki sla kiba biang.

La kynnoh ruh ba kitei ki arngut ki bar jylla ki la shu jah rngai noh hadien ba kim shym la lah ban pynshisha la katei ka Kompani ka dei kaba biang ne em ki kot ki sla bad kat haduh mynta ym shym la lah ban iakynduh shuh ia ki namar ba wat ia ki mobile nombar ruh ki la bujli noh da kiwei pat.

Ym tang katta hadien ka jingshah kem kitei ki arngut ha ki dkhot ka seng, u Pio Dkhar u la wan ialam da ia uwei pat u briew uba kyrteng u Hemant Gurzal, kaba pyni ba namar ka jingioh nong kaba palat liam ka la pynlong ia utei u briew ban kjit ia ka spah ka phew jong ki paidbah khamtam lei lei ki nongtreikam Sorkar kiba la thep bun bha ka pisa na ka bynta ban ioh nong kham bun, la kynnoh shuh shuh ka seng ha ka ejahar.

Ka Seng ka la sei madan ruh ba ka NSEM ka don ia ka jaka kynshew pisa jong ka ha ki artylli ki bank kumba T. 2 klur eiei, katba kam shym la siew satia ia kito ki nongthep pisa kumba ka la kular ban siew, tang hadien katto katne por ka Saving Account No. jong ka NSEM ha SBI ka long MCA 30445156889 bad ha Axis Bank 696010200003315.

 Web Site Designed and Maintained by SSNetCom Pvt. Ltd.