Friday September 3, 2010
Shillong Edition

By Our Reporter

Jowai, Lber : Ki Pulit Assam na Dispur Police Station hapoh ka jingialam u Sub-Inspector CK Boro, ki la wan hiar mynta ka sngi sha Ladrymbai ban leit wad bad ban shimti ban lum ban lang ia ki shyieng jong uwei u driver uba la shah rahbor bad shah pyniap ha ka kynhun ki nongtuh kali ba shyrkhei.

Kitei ki pulit na Assam ha ryngkat ka jingiarap ki pulit ka Ladrymbai hapoh ka jingialam u SI BR Marak, da ka jingialam lynti uwei napdeng kitei ki nongtuh kali, ki la lah ban wan kit ia ka metiap ba sah sa tang ki shyieng jong u driver ka Tata Mobile AS01BC-5692, uba kyrteng u Md.Mohibul Haque.

Ia u Md. Haque la rahbor da ka kynhun ba saw ngut ki nongtuh kali na sor bah Guwahati naduh ka 7 tarik u bnai ba ladep da kaba leh mynleh shim wai ia katei ka kali ban leit sha Nowkong. Hynrei kitei ki runar ba shyrkhei ki la kit ia u bak sha Jaintia Hills bad hadien ba ki la ai dawai pynbuaid ia u ha ka jyntah ha ka por ba bamja, u la ioh thiah ym tip briew shuh bad ki la syngit ia u ryndang da ka jain haduh ba un da iap bad ki sa bret pat ia ka metiap jong u ha kawei ka khlaw hajan ka Power House jong ka Leshka Hydel Project.

Ki pulit Assam hadien ba ki la ioh kem ia ki 4 ngut kitei ki runar na ki bynta bapher bapher ka nongbah Guwahati, ki la phla ia ka metiap jong utei u driver la bret sha ka Jaintia Hills bad u la ialam lynti ia ki pulit ban leit sei ia katei ka metiap.

Ki saw ngut kiba shah kem ki kynthup ia u Bablu Rabha uba khot sin da ka kyrteng Buskal uba dei na Sonapur, Assam bad uba la wan ialam ia ki pulit ban pyni jaka bret ia ka metiap utei u dribar. Ki lai ngut kiwei pat ki kynthup ia u Bhokti Rabha, u Rajiv Kalita, kiba na Krishnanagar, Guwahati, bad u Bitun Roy na Boiguntinagar.

Utei u Bablu u la iathuh ba ki don ruh ka kynhun ha Meghalaya, ha Nongpoh, Ladrymbai bad Khliehriat ha kaba u Boss jong katei ka kynhun jong u, u ju ia kynduh ia ki man ka por. Utei u Boss jong katei ka kynhun kang tuh kali udei uba la tip kyrteng kum u Siddhu Koch uba ju khot sin Jitu.

Ki pulit ka Dispur PS ki dang thwet ia u Jitu bad ia uwei pat u dkhot ka kynhun, u Protul Basumatary kiba dang jahrngai haduh mynta.

Utei u Bablu u la iathuh ba ia katei ka Tata Mobile la die ia ka sha Arunachal Pradesh. U la iathuh ba ki la dept uh bun tylli ki kali bad ia kine ki kali tuh la die sha Manipur bad Arunachal Pradesh bad ka jingioh nong ka long 9000 tyngka marwei ia kaba la siew ia kid a utei u boss jong ki, u JItu.

Ki pulit ha Ladrymbai ki suba ba ka kynhun kadei kaba donkti bha ban tuh kali wat ha Jaintia Hills bad na ka bynta ban tohkit bniah ia ki, kin sa wanrah ia ki sha LAdrymbai hadien ba ki pulit Assam ki la dep ia ki jingtohkit ha Assam.

 Web Site Designed and Maintained by SSNetCom Pvt. Ltd.