Friday September 3, 2010
Shillong Edition

By Our Reporter

Nongpoh, Lber : Ki paidbah nongshong shnong jong ka shnong Kdohhati mynta ka sngi da ka jingkmen kaba khraw ki la pynpaw ia ka jingsngewnguh ia ka ophis jong ka ICDS Umsning. Kane ka la paw shai dei hadien ba na ka liang u MLA ka Mawhati, Bah Donbok Khymdeit, Chairman ka MCCL u la plie paidbah ia katei building ICDS ba la bei pisa da ka ophis jong ka ICDS Umsning ha ka jinglut kaba la kot sha ka Rs1.75 lakhs tyngka.

Ha kane ka sngi baroh ki paidbah nongshong shnong da ka jingkmen ki la ialum lang ha kane ka jingplie ia katei ka building ICDS kiba kynthup naduh u Rangbah Shnong, Bah S. Kharlukhi, ki dkhot jong ka shnong, ki longkmie ki longkpa bad ryngkat ka jingdon lang jong u CDPO ka ICDS Umsning, Bah L. Lyngdoh la aiti noh ia katei ka building kum ka nongkynti jong ka Shnong Kdohhati ban sumar sukher hadien ba la dep ban plie paidbah ia ka building.

U Bah Donbok Khymdeit haba kren ha kane ka sngi kum u kongsan u la ong ba ka jingdon jong ka ICDS Centre ka long kawei na ki lad jingkyrkhu ba u paidbah ka jylla u ioh jingmyntoi, hynrei ka dangdon pat ka jingduna kaba ha ka jylla namar ba ym lah ban pyntreikam ha ka rukom kaba pura ha kaba lada ia nujor bad kiwei kiwei ki jylla jong ka ri, ka jylla jong ngi ka dang duna ban ioh ia shibun ki lad jingiarap.

Wat la katta ruh ka jingdon jong ka ICDS centre ka la iarap shibun ia ki paidbah nongshong shnong ka jylla ha baroh ki liang, namar da ka jingdon ka ICDS ha man la ki shnong ka pynteh song ia ka jingialong tylli jong ki shnong ki thaw ha kaba baroh ki longkmie ki longkpa bad ki hep barit ki ioh ia ki lad jinghikai na ki Aganwadi kiba la ioh ia ki lad jinghikai ban hikai shaphang ka khuid ka suba, ka koit ka khiah bad ki dawai da shin ba la iarap lyngba ka sorkar kmie.

U la ong ruh, ka ICDS centre ka long hi thik kum ka shlem ban saindur ia ki hep barit ba ki sdang ban ioh ia ka jingnang jingstad ha kaba ha kane ka centre la ai jinghikai lut ha baroh ki liang kiba kynthup naduh ka pule ka puthi, ka koit ka khiah, ka bam ka dih bad kiwei kiwei ki lad jinghikai ba ka sorkar ka thmu ban pynsngewthuh ia ki nongshong shnong ba ki dei ban sngewthuh ia ka dor jong ka jingkoit jingkhiah bad ka jingnang jingstad.

Kumta, u la kyntu ia ki nongshong shnong ba ki dei ban pyndonkam hok ia katei ka building ba ka sorkar ka la mang kyrpang na ka bynta ka shnong ban ioh ia ka jingmyntoi ha ka ban saindur ia ka bha ka miat jong ka shnong ka thaw.

Shuh Shuh na ka liang u CDPO. Umsning, Bah L. Lyngdoh ruh ha ka jingkren u la ai ia ka jingbatai bad ki jingpynshai halor ka jigmyntoi ba la ioh sha ki shnong ki thaw da ka jingdon jong ka ICDS centre bad kumjuh ruh ba ha Ri-Bhoi District haduh 258 tylli ki shnong ki la ioh ia ka jingmyntoi da ka jingdon jng ka Aganwadi centre ha ki snong jong ki.

 Web Site Designed and Maintained by SSNetCom Pvt. Ltd.