Friday September 3, 2010
Shillong Edition

By Our Reporter

Jowai, Lber : U Additional Deputy Commissioner ka Khliehriat Sub Civil Division, u bah E. Kharmalki, mynta ka sngi u la lum jingialang ia ki ar shnong, ka Mynthning bad ka Samasi na ka bynta ban ia kren pynbeit ban wanrah ia ka jingiasngewthuh jingmut bad ka jingiasuk ha kaba iadei bad ka jingia khajia knieh Khlaw par dewiong kaba la sdang naduh u snem 2007.

Ia kane ka jingialang la lum ha kamra treikam jong u ADC bad la ia donlang ruh u SDPO ka Khliehriat, u ma WS Muksor, u Circle Inspector, bah G. Wahlang bad u OC ka Khliehriat, u ma EK Pala ha ryngkat ki rangbah nongialam shnong ki ar shnong.

Hynrei wat lada ki bor District bad bor pyniaid Sub-Division ki la shim khia ban wanrah ia kitei ki ar shnong sha ka jingiasuk bad ia sngewthuh jingmut, pynban ka jingialang ka kut noh khlem jingmih ei ei naba ki ar shnong kim hun ban ia beit satia.

Ka shnong Mynthning kaba la biang ki kot ki sla ban pynshisha ba kadei ka hok longtrai ia katei ka khlaw shnong jong ka kam hun satia ban ia sam mar shiteng kumba la dawa da ka Samasi. Kumta kane ka jingialang ka kut noh khlem lah rai ei ei.

Lah ban kynmaw ba ha une u bnai ba la dep na ka liang u Deputy Commissioner ka District ha ryngkat u ADC bad ki heh pulit na Khliehriat Sub-Division ki la hiar ban leit jurip ia katei ka jaka ha kaba ki la ai por ruh ia kitei ki ar shnong ban iakren sani bha hapoh ki dorbar shnong jong ki ban ai ia ka rai ha ka jingialang kaba mynta ka sngi, hynrei namar ba kam don kano kano ka jingiabeit, ka jingialang ka la kut noh khlem seisoh.

Lah ban kynmaw ruh ba ka jingiaknieh ia ka Khlaw Shnong Mynthning hapdeng ka shnong Mynthning bad Samasi ka la mih bun ki kynrum ki kynram naduh ka jingiabyrngem, ka jingsiat da ki suloi, ka jingshah thang ki jaka sah ki nongbylla, bad ka jingpynjot pynpra ia ki tiar ki tar kiba dei jong ka shnong Mynthning kiba pyntrei dewiong ha katei ka jaka khlaw. Kumjuh ruh ka mukotduma halor kane ka dang iaid ha District Council Court bad haduh ha High Court.

Ka jingkynram kynram ka mih dei namar ba ka shnong Sa masi kam ju burom satia ia ki hukum ka iing bishar ha kaba ki la leh bad thom da ka bor ban ioh klun ia katei ka jaka. Ka Samasi kadei ka shnong kaba don ka jingiakhajia bad iaknieh jaka bad bun kiwei pat ki shnong, kynthup ia ka Pala, ka Shyrwang bad Khahnar bad baroh kine ruh ki dang don hapdeng ka jingialeh mukotduma.

 Web Site Designed and Maintained by SSNetCom Pvt. Ltd.