|
Kumno ki sngew ki longkpa / longkmie halor ka Women Reservation Bill
|
By Our Reporter
Shillong, Lber : Ka jingmynjur jongka Iing Dorbar Rajya Sabha ia ka bha ba kyrpang na ka bynta ki longkmie ne ka Women Reservation Bill ka la wanrah ka jingsngew ba har rukom na ki longkpa bad longkmie ha ka jylla Meghalaya namar ki don kiba kyrshan ia katei ka Bill bad ki don pat kiba pyrshah. Ka daw ka long ba hangne ha Meghalaya ki kynthei ki long mar ia ryngkat bad ki rangbah ha ki liang baroh bad lada phai lei lei sha ka jingioh nongkynti na la iing la sem ki kynthei ki ioh jingmyntoi katba u rangbah te ha kiba bun ki khep um ioh ei ei ne u hap ban mih thylli beit na la iing la sem namar la bud ia kaei kaba ki longshwa man shwa ki la lap lynti khamtam da kaba pynshong nongrim ia ka rukom ai jait sha ka kynthei.
Haba iakren bad kiba bun ki rangbah na ki district bapher bapher jongka jylla ki la pynpaw da kawei ka sur kata “ Balei ba ki longkmie ne ki kynthei ha ka jylla kin dang hap ban ioh ia kata ka Reservation namar kumba long mynta kim don ka jingiapher ei ei ruh em na ki rangbah lada phai naduh ka kam iing kam sem ki kynthei ki long halor ha ka kam nong ioh kynti, ha ka imlang ka sahlang kim don jingiapher na u rangbah bad wat ha ka sain pyrthei ruh ki ioh beit ban ia shim bynta ha ki kam election.
Nalor kane ki don ki rangbah ha ka jylla kiba kyrshan ia katei ka bill kiba pynpaw ba ka jingrai ban buh bhah kyrpang ia ki kynthei ha ka kam synshar khadar ka long kaba biang eh namar kin ioh ban iashim bynta kumno ban pyniaid beit pyniaid ryntih ia ka synsha khadar ha ka jylla ym ban shu shaniah beit ha ki rangbah. Uwei na ki rangbah u la pynpaw hooid baroh shi katta ki longkmie kim pat ioh eh ban iashim bynta ha ka synsha ka khadar hynrei da kane ka jingai bhah kyrpang ia ki kan iarap ia ki ba kin nang ioh ban pynpaw ia ka bor jongki kum ki longkmie kata ym tang ha ki iing dorbar Jylla hynrei wat ha ki iing dorbar jongka sorkar pdeng ruh.
Wat la ia katei ka bill la dep mynjur hapoh Rajya Sabha hynrei yn sa rah pat hapoh ka IIng Dorbar Lok Sabha ban ioh ka jingmynjur ban pynskhem ia katei ka bill.
Copyright mawphor.com
|
