Friday September 3, 2010
Shillong Edition

By Our Reporter

Shillong, Lber: Khnang ban weng ia ka jingdheng kali kaba jur ha kane ka sor Shillong u Bah D.D Lapang, Myntri Rangbah ka jylla hynne ka sngi, ha ka jingiakynduh bakyrpang bad u General Officer Commanding in Chief, Eastern Command, u Lt. General V.K Singh u la kyrpad ia u ban ailad na ki jaka ka Cantonment ban ailad ia ki Fly Over ban iaid lyngba na ki ktem sah jong ki, khnang ban weng ia ka jingdheng kali kaba shyrkhei bha ha kane ka nongbah. Nalor kata, kine ki arngut ki la iatai sani bha ruh halor ka jingpyndonkam jong ki bor pyniaid District ia ki jaka jong ki len shipai na ka bynta ban tei ia ki jaka pynieng kali (Parking Lot) na ka bynta ki kali Shillong bad Jowai kaba don ha Khliew Iewduh bad ha kiwei kiwei ki jaka jong ka sor Shillong kiba la wan rah pynban ia ka jingpynthud ia ki bor badei peit jong ka Cantonment bad kumjuh ruh ia ka Sorkar.

Ha kaba iadei bad kane, ka Sorkar Jylla kan sa iakren bad ka Defence Ministry, New Delhi ban thaw ia ka High Power Committee ban pynlong ia ka jingjurip na ka bynta ban aiti ia ki katto katne ki jaka na ki len shipai na ka bynta ka jingpyn donkam jong u paidbah ha kaba ka sorkar kan iakylliang pat bad ki shipai da ki jaka kiba don shabar na ka sor Shillong.

Na ka liang jong utei u heh shipai u la kular ban iarap halor kane ka jingkyrpad jong u Myntri Rangbah ban ai ia ki jaka na ki len shipai na ka bynta ka (kam pynroi sor) Urban Development Project jong ka Sorkar Jylla.

Ha ka por janmiet, u Lt General V K Singh hadien ka jingiakynduh ia u R.S Mooshahary, Lat ka Jylla, haba krne ha ki nongthoh khubor, u la kam ba baroh ki khyndew ba la shimti da ki shipai ki dei kiba biang ka ki kot ki sla bad ki nongkynti.

U Lt. Gen. VK Singh u ban sa shimti kum u Chief of Army Staff (COAS) ha u Iaiong mynta u snem u la ong “Ngam tharai ba ka don kano kano ka jingtam pud. Baroh ki khyndew ki shyiap ki dei kiba ngi da biang bad ki kot ki sla. Ki jingkynnoh ki long tang halor ki nongrim kiba thew sha kiwei pat ki jingthmu. Hynrei kat ha kaba donkam ban iapynbeit, ki Army ki long kiba kloi ban wan shakhmat”.

Shuh shuh ha ka jingkren jong u, ki paw ba ka lah ban don ka jingweng noh ia ki kynhun shipai pahara jong ki Army na kane ka thain shatei lam mihngi da kaba pynshong nongrim halor ka jingwanphai pat ka shongsuk shongsain. U Singh u la wanpoi ha Shillong hynne ka sngi bad u la iakynduh ia ki heh shipai ka 101 Area bad kumjuh ruh u la iakynduh kyrpang ia u Lat Mooshahary.

Haba kham pynshai ia katei ka jingthmu hadien ba bun na ki kynhun kieng atiar ki la nang wan shakhmat ban iakren iasuk bad ka sorkar India, u la pynpaw ba ha ki khyndiat por ban wan, lada ka shongsuk shongsain ka nang kham klai, ki pyrton shipai kin sa nang wanphai pat sha ki ktem bad ki cantonment. “Ki army ki wan shakhmat tang hadien ba la wan ka jingkhot ban iarap ia ka sorkar, nga ngeit skhem ba ki pyrton kin sa hap ban mih na kane ka thain ban leit pat sha kiwei ki thain kiba kham donkam ia ka jingshakri jong ngi”, u la bynrap.

U Singh ha kane ka jingwan jngoh, u la leit ruh sha Tezpur, Assam bad kumjuh ruh sha Itanagar, Arunachal Pradesh ha shuwa ba un wan iuhkjat ha Shillong.

 Web Site Designed and Maintained by SSNetCom Pvt. Ltd.