|
Nga lyngngoh balei i Kong Ampareen kum i para Minister im shym la kylli shwa na nga : Dy. CM
|
By Our Reporter
Shillong, Lber : U Dy Chief Minister ka jylla u bah Bindo Lanong u la pynpaw ka jingsngew lyngngoh kaba khraw halor ka jingshim khia jong i Kong Ampareen Lyngdoh iba dei i para myntri ne Minister ha kane ka sorkar MUA ban iadon lang bad ki ar ne lai ngut ki longkmie khlem da kylli ne tohkit shwa na u halor kaei kaba u kren.
Haba iakren bad u Mawphor mynta ka sngi u bah Bindo u la ong “ Nga lyngngoh balei ba i Kong Ampareen iba don lang ha ka juh ka kynhun myntri jong kane ka sorkar im shym la kylli bad tohkit shwa na nga ia kaei kaba la jia shwa ba kin shim ia ka rai ban ai ka jingkyrshan ia ki ar ne lai ngut ki longkmie”. Namar u la pynpaw ba kum ka para Minister ha kajuh ka kynhun myntri ka la dei ban twad jingmut ne kylli shwa na u khnang ba kan shai kdar shwa ba kan shim ia kano kano ka rai ym ban shu rai matlah bad kyrshan beit ia ka bym dei ban kyrshan ruh. U la pynpaw ba ka jingkyrshan bad dawa jong i ba un pan map ka long kaba khlem nongrim namar u khlem kynthoh pyrshah iano iano ruh hynrei u kren beit ba ki don ki ar ne lai ngut ki long kmie kiba shu long beit kum ki sein puh kiba shu kynthoh pyrshah beit iano re iano haba ki leh ia kano kano ka kam na ka bynta ka jingbha bad ka jingmyntoi jong ki paidbah ka jylla. Shwa ia kane u la pynpaw ba um sngewthuh da shisha balei ba kitei ki katto katne ngut ki longkmie ki kwah ban pynheh beit ia ka kam kaba rit eh bad khlem da iathuh ia u ruh kaei kata ka daw kaba ki kwah ban pynheh haduh katne katne ia ka kam.
Nalor kane u la pynpaw ruh ba u don kiba shu pynthep ha shyntur jongu ia kaei kaba u la kren namar ha ka jingiakynduh bad ki longkmie u la dep pynpaw ba ki dei ban sngap bha ia ki tape record ia kaei kaba u la kern namar u lapynpaw ba u khlem da jer kyrteng ne kynthoh iano iano ruh hynrei kaei kaba u ken ka long beit da kaba u pynpaw ia ki ar ne lai ngut ki kynthei kiba shu long sein puh beit haba pyrshang ban trei ne wanrah ia kano kano ka jingpynkylla ha ka jingtrei kam ruh.
Lah ruh ban pynkynmaw ba wat u myntri rangbah jongka jylla u Dr. D.D Lapang ruh u la dep pynpaw ba lehse ka jingkren jong u bah Bindo ka long halor ka nongrim ba u iohi ba ki lah ban don ki langiong wat napdeng ki longkmie ruh ba u sa ken kumtei. Hynrei wat la katta ruh kum u myntri rangbah um kwah ban ia millai bad katei ka kam namar u pynpaw ba kaei kaba u bah Bindo u kren ka dei ka jingkren shimet jongu um kaba la kren da ka sorka MUA.
Copyright mawphor.com
|
