Monday September 6, 2010
Shillong Edition

By Editor

Ka 8 tarik U bnai Lber 2010 ka dei ka sngi kyrpang ki kynthei salonsar ym tang ha ka Jylla jong ngi lane ka Ri jong ngi hynrei ha ka pyrthei baroh kawei ki rakhe ia kane ka sngi kum ka sngi kyrpang jong ki. Ka long shisha kaba sngewtynnad ban pyrkhat ba kan don da ka sngi kyrpang na ka bynta ki riew kynthei ba kin pyni pynshai ia la ki jingeh jingiakynduh bad ban dawa na ki bor kiba dei hok ban ai ia ki ia kita ki hok kiba dei ban ioh.

Kaba itynnad ka long ba ha ka Jylla jong ngi ha kaba ki kynthei kim ioh wat tang ia ka lad lane ka kabu ban shong ha ka dorbar u khasi ban jied ia ki rangbah shnong lane ki sordar shnong hynrei mynta ka kynti kin sa ioh ban synshar kylla lane phah pyndem tdong ia kita rangiasaid ka dorbar u khasi. Lyngba kane ka jingpynkhamti lane ai bor ia ki riewkynthei ka lah ban wan ka synshar ka khadar kaba khuid ba suba ba ki kynthei katkum ka pyrkhat khasi ki long ki nonglum nonglang, ki nongri nongsumar kiba kit ia ka khia ka shon ka ing ka sem ia ki khun ki kti kumta kin kit ia ka Ri bad ka Jaidbynriew.

Ka jing don jong ki 20 ngut jong ki riewkynthei ha ka dorbar thawain kan long shisha ka jingkylla bak ly bak ha kaba ki jingeh bad jingiakynduh kan iaryngkat tarajur. Ka rai kan ym long shiliang shuh tang ia U rangbah lane tang ia ki kynthei hap ban da ngam jylliew shuwa ban rai ia kiei kiei. Ka jingwanrah jong ka sorkar pdeng ia kane ka bill ha ka dorbar thawain ka long shisha ka jingpyrshang ban ai sngewbha ia ki riew kynthei baroh ha kane ka Ri jong ngi da ka bor kaba kim pat ju mutdur ha ka jingim jong ki. Lada kane ka Bill kan urlong lane treikam shisha ka jingiakhun ia ksaid jong ki riewkynthei ka lah ban kut noh namar ba ki la ioh ban pynsngew ia ka sur jong ki sha ka dorbar thawain ym shuh da kaba pyrta na ki lyngwiar dpei ki jong ki khlem don mano mano ban sngew lane ban shimkhia ia kita ki jingeh jingshon jong ki.

Lada ngi shim ia ka Reservation Policy, ka mut ba ha ki jaka ba ki kynthei kin ia aireng ki shynrang kim lah shuh ban tur, bad ha ki jaka kiba kim ioh bynta ka mut ba tang ki khatar bor kin ia aireng. Ka jingkylli ka mih “Katno ngut na ki kynthei khasi jong ngi kiba la iar ha ka sain hima sima?” lane ka lah ban long ruh ba ka jingma ka ap, kumba u myllung Soso Tham u la kren ba “ynda la kynih ka syiar kynthei, hangta ka pyrthei ruh ka la wai” te hynrei kata ka jingwai ka lah ban long ba ka pyrthei ki Rang kan wai ba la jyllei ka thok ka shukor, ka bamsap bampong bad ka khwan myntoi shimet.

Lada ngi phai sha la ka Ri ne Jylla lajong, hangne ha sor kam pher namar ka jingiakhun la ju iohi bad sakhi ruh ba ki kyntei ki mih madan ban iakhun lane aireng pyrshah ia ki khatar bor hynrei ha ki thain nong kyndong kham niar ban iohsngew lane don ban mih kum kine. Ka jingma ka long ba lada don kano kano ka constituency kaba sha ki thain nongkyndong ki hap ha kata ka Reservation Policy bad kata ka jaka kam don candidate lane riewkynthei kiba la kot ka nang ka tip ka pyrkhat ka pyrdain “mano ban ieng?”

Lada shu peit te yn bun hi ki tnga sitting MLA ki ban iakhun namar ba ka dei ka Vote Bank lane kata ka Strong Hold jong u lok bad lada ym long kumta ruh u sitting te un ym ailad da kiwei pat hynrei un buh wat da kiwei ki ar ban ioh bat ia ka bor, bad lada ka long kumta “hato kan ym nang kynrum kynram shuh?” Ha ka pyrkhat khasi lei lei ngi ong ‘ ka kynthei ka dei tang ka nonglum nonglang ka nongri nongsumar bad ban peit ia ki khun ki kti namar ba u kpa u dei uba lah uba iai” te ynda la mih madan noh ka kynthei “mano pat ban shim ia kata ka bynta ha ka iing ka sem?” Te kaba kongsan ka long ba hato ka Jylla jong ngi ka long kaba la pynkhreh ba kan pdiang ia ka ?

 Web Site Designed and Maintained by SSNetCom Pvt. Ltd.