Thursday September 9, 2010
Shillong Edition

By Our Sport Reporter

Shillong, Lber : Mynta ka sngi ka All India Football Federation ka la pyllait paidbah ia ka prokram (fixture) kaba iadei naka bynta ka lympung ialehkai Second Division I.League kaban long ha ki lai tylli ki jaka (Bangalore, Delhi bad Tripura) kaban sdang naduh ka 27 taik mynta u bnai ha ka jaka jong ka 26 tarik kumba la pynbna iaka mynshwa.

Ha kane ka kynti ka kynhun ialehkai ka Ar-Hima FC (kaba la bat haduh lai sien kynthih ia ka nam lahduh jong ka Super Division ka SSA bad kumjuh ruh ban rah ia ka nam lahduh ka Megha-laya Club Championships) ka long ka kynhun ialehkai nangne napoh ka jylla kaba la ioh ban aireng sha kane ka lympung iakhun bad ka don ha ka Group ‘C’ bad ka jaka ba kan iakhun kan long hapoh nongbah Agartala, Tripura.

Na ka prokram ba la pyllait mynta ka sngi ka jingiakhun ba nyngkong ia kane ka kynhun ka jylla kan long pyrshah ia ka Guwahati Town Club ha ka 27 tarik.

Haba iakren bad u Mawphor u General Secretary kane ka kynhun u bah K.S Kurbah (bah Kar) u iathuh ba mynta kane ka kynhun ka la hiar shapoh Dawki ban kilan namar ba kane ka jaka ka ia syriem bha ia katta ka jinglong jingman ka suinbeng bad ka nongbah Agartala.

“Kum shi bynta ban pynmlien iala ki jong ki player, naduh hynne ka sngi ngi hiar bad 25 ngut ki player ban ia kilan shwa shipor hapoh Dawki, kane ka long kum shi bynta ban pynlong ia ki player baroh ba kin lah ban iakhun haba ki la iuh kjat hapoh Agartala” la bynrap u bah Kar.

Na kane ka jingiakren la sngewthuh ba marsien ioh khubor na ka AIFF ba la ioh ban iakhun sha ka second division, kum ka kynhun ka la lum la lang ia ki player ban ia kilan tisa bha, namar wei haba la rung sha ka lympung iakhun, kum ka kynhun ka da kwah ban poi shisha shaduh ka thong bad katta ka long ban iai kiew ia u mawjam ban da kynjoh sha ka kyrdan jong ka I.League.

“Kane ka jingiakilan hapoh Dawki kan iai neh kumba katto katne taiew tad haduh ba da jan poi ki sngi ba ngin hiar pat sha Agartala. Ha shwa ba ngin hiar ngin sa lah pat ha kaban pyn bna paidbah ia ki kyrteng jong baroh ki player kiban mih khmat ia ka kynhun ha kane ka kynti iakhun kaba myn ta” la pynkut u bah Kar.

 Web Site Designed and Maintained by SSNetCom Pvt. Ltd.