Thursday September 9, 2010
Shillong Edition

By Our Reporter

Shillong, Lber:Ki dkhot jong Ka Dorbar Ki Khlieh Nongsysnhar ka Ri Hynniewtrep, mynta ka sngi ki la iakynduh ia u Bah DD Lapang, Myntri Rangbah ka jylla ha Ophis treikam jong u ban buh ia ka memorandum ha kaba iadei bad ka draft bill “The Meghalaya Constitution and Administration of Village Development Councils Act 2009.”

Ha kane ka jingia kynduh lang la iaphylliew jingmut sani bha halor katei ka draft bill ba la tyrwa da ka tnad Community & Rural Development jong ka Sorkar Jylla ban pynjari ia ki Village Development Council ha ka jylla Meghalaya.

Na ka liang ki Khlieh Nongsynshar ki la pynpaw ba ka Sorkar India, kum ka dak jingithuh ia ki rukom synshar kiba kyrpang ka la pyllait ia ka jylla Meghalaya na ka aiñ Panchayati Raj, bad kaba sah ka long ban wanrah ia ka aiñ kaba bniah kaban ithuh ia ki kyndon pyniaid kam (constitution and administration) jong ki Dorbar Shnong, Raid bad Hima bad ba kin don ia ki lad ban iashim bynta ha ka roi ka par lyngba ki jingpynjanai katkum ka juk mynta.

Ki Khlieh Nongsynshar ki la pyntip ha u Myntri Rangbah ba ki Hima/ Elaka ki dang pynkhreh ia la ki kyndon pyniaid kam (constitution and administrative functions, rules, powers and jurisdiction ) ia kaba kin sa ai ha shen bad la kyntu jur ia u Myntri Rangbah ban saiñ dur noh kham kloi ia kine ki aiñ ynda ki Hima/ Elaka ki la phah ia kine ki jingtyrwa.

Ki Khlieh Nongsynshar ki la pynpaw ia ka jingeh kaba khraw ha ka synshar khadar bad bishar lada mih mih ar tylli ki bor shnong ha kawei ka shnong.

Na ka liang ka u Bah DD Lapang u la pynpaw ba ka long kaba donkam ban pynneh pynsah ia ki Riti ki Dustur, hynrei ha ka juh ka por u la kyntu ba la don kam ia ki Khlieh Nongsynshar ban pynjanai noh ia ki kyndon pyniaid shnong, bad kiwei kiwei kat kum ka juh kaba mynta. U la pynpaw ia ka jingkmen ba ki la kloi ban rah ia kine ki jingpyrkhat sha la ki Dorbar ban ioh ban ia syllok bad ban wanrah pat sha ka Sorkar.

U la pynpaw ia ka jingkloi ban nang ai por ia ki Khlieh Nongsynshar bad u la kyntu ia ki ban kham pynkloi khnang ban lah ban pynwan dur ia ki rukom treikam na ka bynta ki jingmyntoi na ka liang ka development sha baroh ki shnong. U la pynpaw ba ka Jylla ka duh ei ia ki jingmyntoi namar bym pat don ka aiñ kaba ryntih ha baroh ki shnong ha ka jylla Meghalaya, bad kumta ka Sorkar Jylla ka la pynmih ia kine ki jingtyrwa khnang ba kan sdang ka jingia pyrkhat bad ka jingsaiñ dur na baroh ki liang.

 Web Site Designed and Maintained by SSNetCom Pvt. Ltd.