Monday September 6, 2010
Shillong Edition

By Our Reporter

Nongstoiñ, Lber: Ka long kaei kaei kaba sngewthamula ba ia ki kam Kontrak ha West Khasi Hills la shongkulai lut da ki nongtrei sorkar la ka long ha PWD,PHE,Irrigation bad kiwei kiwei ki tnad treikam ka Sorkar. Kaba kham pynlyngoh shuh shuh ka dei ba wat ia ki kam spulai ha ki ophis sorkar ruh la shongkulai da ki khun ki pyrsa jong ki Officer kiba don ha ki shuki ha ki ophis sorkar bap her bapher.

Ha ka jingbuddien ba bniah bad ba slem bha da u nongthohkhubor halor ka jingsahkut jong ki pyntrei ia ka surok bad kiwei kiwei ki jingtrei la lap ba ka daw jong ka jingbymtreh jong ki Kontraktor ban trei bbniah katkum ki jing bthah jong ka Sorkar bad ban bud katkum ki kyndon ba la buh bad kapor kaba biang ban pyndep ka dei namar ka jing bym ioh ia ka bill ha ka por ba ki donkam.

Haba iakren bad ki Kontraktor kiba la ju pyntrei ia ki surok bad ki pipe line ha ki phew tylli ki shnong ki la iathuh ba ma ki ki kylla long ki nong ai ram ia ka sorkar katba ka pisa sorkar kaba da ki spah klur ba la phah manla u snem ban siew ia ki bills jong ki Kontraktor la shu bam suk da ki nongtrei sorkar.

Ban pynshisha ia kane u nongthoh khubor ha ka jingbuddien u la lap ba ki don ki nongtrei kiba na ka PHE Dept kiba kynthup naduh u Engineer ,SDO haduh ki LD kiba la pyndonkam ia ki kyrteng jong ki bahaiing,ki khun pyrsa ban Register Kontraktor katba ia ka kam la pyniiad da ma ki khlem ka jing tip jong kitei ki ba la shah pyndonkam ia ki kyrteng.

Ka jing shisha ka long ba lada ioh jingtrei bad leit ban kylli ha ki Kontraktor kiba don ia ki kyrteng kin ym lah ban tip wat ia ka jaka ba ki ioh jingtrei. Haba phai pat sha ka tnad PWD la lap ba ki kurim, ki Khun pyrsa, ki bahaiing jong ki ophisar kiba trei ha katei ka tnad treikam ki dei ka daw jong ka jing duh bill jong ki Kontraktor namar ba kat haduh ban da tip kiwei ma ki ki la ieng laiñ naduh bym pat plie office.

Katei ka jingdon jong ki bahaiing jong ki Ophisar ka pynsngew stai palat ia ki bad ruh ka jingleh shiliang khmat ban siew ia ki bills ka jur haduh katta katta. Ha katei ka rukom lada ia ki Kontraktor ki bym dei kiba haiing la siew san hajar tyngka na ka bill kaba san lak tyngka ia kiba haiing jong ki Ophisar pat la siew palat ia ka mar shiteng. Halor kane kino kino kiba kwah ban pynshisha ki hap ban da buddien bniah bha haduh ka Ophis Tereasury kumta kin lap tyngkreiñ ia ki jingshisha baroh. Halor kane ki Kontraktor ki la ong ba lada kan dang iai bteng kumne shi kumne kin sa shong pyrkhat bad kim banse ban shim da ka rai kaba tyngeh wat ban khot da ki prokram iakhih ruh.

 Web Site Designed and Maintained by SSNetCom Pvt. Ltd.