Thursday September 9, 2010
Shillong Edition

By Our Reporter

Jowai, Lber : Ka rai jong ka SSA ban beh noh ia uwei u nonghikai SSA na man kawei pa kawei ka Skul Upper Primary School (UPS) ha Jaintia Hills ka la wanrah ka jingsngew pyrshah kaba jur hapdeng ki nonghikai SSA kiba la hikai la katto katne snem ha ki skul bapher bapher haka jylla bad ki nonghikai ha Jaintia Hills District ki la kulmar jingmut bha.

Kane ka jingpyrshah jong ki nonghikai ka la jia hadien ka jingpynmih hukum na ka ophis u DMC, kaba la hukum ia ki skul UPS baroh ba terminate noh ia uwei nonghikai na ki 4 ngut ki nonghikai kiba hikai katkum ka SSA scheme. Katei ka order kadei kaba la phah na ka head Office jong ka tnad Education, Shillong ia kaba la rai ruh da ka sorkar jylla.

La ioh jingtip ba namar ba ka SSA kadei ka Central Sponsored Scheme bad katkum ka Central Norms la bthah ban thung tang 3 ngut ki nonghikai ha kawei kawei ka UPS ha ka jingsiew kaba 4500 tyngka shi bnai, hynrei na ka sorkar jylla pat ha ka jaka ban thung lain gut ka la thung noh 4 ngut da kaba siew tang 3000 tyngka marwei ha ka shi bnai.

Kumba long mynta, ka sorkar ka don ka jingthmu ban pynkiew tulop ia ki nonghikai SSA, hynrei kam don pisa satia bad khnang ban pynkiew ia kin aka 3000 sha ka 4500 ka la rai ban weng noh uwei ne kawei ka nonghikai na man ka UPS khang ba kan dup lah ban pynkiew tulop.

Kawei pat ka jingeh ka long ka katkum ka jingbthah ka Sorkar Kmie ki nonghikai ki dei ban long kiba la pass PUC lane +2 (Arts lane Science) da ka jingpyrshang ki nongmihkhmat bad ki Chairman bad Secretary ki School Managing Committee ban pynlong Politics ia kane ka policy thung kam, la shu thung wat ia kito kiba pass tang ia ka Matrik bad ki Under Matrik bad kiban shah ktah nyngkong eh ki dei kito kiba khlem pat pass PUC lane +2.

Bun ki nonghikai ki la pyrshah ia kane da kaba kynnnoh ba ka sorkar ka la lehbein ia ki bad khamtam eh haba kane kadei ka jingknieh noh ia ka ja kpoh jong ki.

“Ha ka jingshisha ka sorkar ka la dei ban weng ia kito ki skul bad ki nonghikai kiba khlem trei kam pura, kiba duna ki khynnah skul”, la ong uwei na ki Nonghikai SSA UPS. “Ki don ki skul kiba don tang 8 lane 10 ngut ki khynnah skul, katba ki nonghikai pat ki don 3 lane haduh 4 ngut”, lada ka sorkar ka duna pisa, kam dei ban shu pyllut kai ia ka pisa kum ha kitei ki skul kiba treikam tang ha rngai”, la bynrap uwei pat.

 Web Site Designed and Maintained by SSNetCom Pvt. Ltd.