Thursday September 9, 2010
Shillong Edition

By Our Reporter

Shillong, Lber : Ka Soil &Water Conservation Department jong ka jylla mynta ka sngi ka la plie ia ka training ba san sngi na ka bynta kumno ban pynkhreh ia ki Detailed Project Report (DPR) jong ki project bapher bapher.

Ia kane ka training la pyllong ha State Institute Rural Development (SIRD) Nongsder bad la plie ia ka da u Bah Barkos P. Warjri, Additional Chief Secretary jong ka sorkar jylla, ha kaba la iadon lang ruh u President jong ka Soil Conservation Society of India, nangta u President jong ka Soil Conservation Society of India, Meghalaya Chapter, u Director Soil and Water Conservation ka jylla bad kiwei kiwei.

U Bah Barkos haba kren ha kane ka jingialang plie, u la ong ba bunsien ka jylla ka shem jingeh bad ki DPR, namar ba bunsien ki DPR kiba phah sha ka sorkar kmie ne sha kiwei kiwei pat ki bor treikam ki wanphai biang ryngkat bad ki jing kylli kiba bun, namar ka jingpynkhreh ka long ka bym biang.

“Namarkata ka long kaba donkam haduh katta katta ban pynkhreh ia ki DPR kiba biang bad kiba sani bha, namar ki lon kum ka nongrim jong kano kano ka jingtreikam ia kano kano ka skhim pynroi”, u la ong.

U Bah Warjri u la pynkynmaw ia ka jingpynkhreh ia ka DPR jong ka NERCOMP kaba dei ka jingtreikam jong ka IFAD, kaba u ong ba ka long kawei na ki DPR kiba biang bha ka jingpynkhreh. U pynpaw ruh ka jingkyrmen ba ka tnad Soil and Water Conservation kan lah ban pynkhreh ia ki DPR kiba biang, namar ba ka jingtreikam jong ka, ka long ha ki jaka nongkyndong da kaba iatyllun bha bad ki paidbah.

Shuh shuh u Addl CS, u la ong ba ha ka jingpyntreikam ia ki skhim bapher bapher, donkam ruh ka jingsngewthuh ia ki jingeh ne ka jinglong jong ki briew, ki shnong ki thaw ha kaba la pyntreikam ia ka projek. Ka DPR kaba biang ka jingpynkhreh kadei ban kynthup ia kine ruh, la ong u Bah Warjri.

 Web Site Designed and Maintained by SSNetCom Pvt. Ltd.