|
|
|
Mait naphang ka ACPL ia ki dieng ha Umlaper, ujor ka FKJGP sha u RCCF
|
By Our Reporter
Shillong, Lber: Ka Federation of Khasi Jaiñtia and Garo People’s (FKJGP), Jaiñtia Hills District, ka la ujor sha u Regional Chief Conservator of Forests, Ministry of Environment and Forest Regional Office halor ka jingpynkheiñ kyndon jong ka Amrit Cement Industries Limited (ACIL), da kaba mait lut naphang ia ki dieng ha Umlaper, Ilaka Rymbai, Jaiñtia Hills tang ka bynta ban bub ia katei ka Karkhana pynmih dewbilat ha katei ka jaka kaba 14.01 hectare. Na ka liang ka seng ka la kyntu ba utei u heh ka tnat un shimkhia halor kane namar kane ka jingleh jong katei ka kompani ka long ka jingpynkheiñ pylleiñ pylleiñ ia ka aiñ khang pomdieng ba la dep pynjari da ka Surpreme Court naduh ki snem baladep.
Katkum ka kyndon kaba 2 ha ka No Objection Certificate (NOC), ba la ai da ka Jaiñtia Hills Autonomous District Council (JHADC),sha katei ka Kompani ha ka 27 tarik, Risaw, 2009, ka la kdew shai ba katei ka Kompani kam lah satia ban pom ne pynkhyllem ia ki dieng kiba don ha katei ka jaka khlem ka jingioh jingthoh na ka ophis jong u Chief Forest Officer jong ka JHADC.
Hynrei ha ka jingleit jurip la lap ba katei ka kompani ka la pynkheiñ pylleiñ pylleiñ ia katei ka kyndon bad tang namar ban shna ia ka surok ban poi sha katei ka jaka ba la thmu ban shna ia katei ka Karkhana pynmih dewbilat, la shu pom bad mait naphang ia ki dieng naduh kiba heh haduh kiba rit.
Ha katei ka ujor ba ka seng ka la phah sha u Regional Chief Conservator of Forests, Ministry of Environment and Forest Regional Office ka la pyntip ba ka jingthmu jong ka Amrit Cement Industries Limited (ACIL) ban seng ia katei ka Karkhana ka dei hapdeng khlaw, ha kaba mynta la shuu pynngat naphang ia ki dieng na bynta ban buh ia katei ka karkhana bad kumjuh ruh ban shna ia ka surok kaba 1 kilomitar ban poi sha katei ka Karkhana kaba la ktah mynta pat ia ki jingthaw kiba ju im ha katei ka khlaw baroh shikatta.
Copyright mawphor.com
|
