Thursday September 9, 2010
Shillong Edition

By Our Reporter

Jowai, Lber : Ka KSU-Khliehriat Circle ka la pynrem jur ia u runar uba la donkti ban pyniap ia ka khyllung 4 snem 5 bnai da kaba ot na u pdot bad kaba la jia ha Myntriang Dein Lariun (Jaka par dewiong) ha ka thain Sohkymphor mynhynin ka sngi nyng kong.

Ka KSU ka la pynpaw ba ia kum utei u briew uba ym don shuh ka mynsiem briew la dei ban set along shi jingim lane rai phasi syndon.

Ka KSU la kyntu ia ki bor pulit ban tohkit bniah halor kane ka jingjia khnang ba katei ka khynnah rit kan ioh ia ka jingbishar bahok.

Ka Civil Society Women’s Organisation kumjuh ka Jaiñtia Youth Federation ki dawa na ka sorkar ba kadei ban pynkynriah kam noh ia baroh ki pulit kiba trei palat san snem ha Jaiñtia Hills da kaba kynnoh ba ynda ki la trei slem kitei ki pulit ki kylla long ki nongda ia ki nongleh kam bymman bad ki nongtrei jong ki heh spah bad ki nongsaiñ pyrthei.

Ka jingdawa jong kitei ki ar seng ka long ba ki nongleh kam bymman bunsien ki ju lait suk na kti ki pulit haba ki leh ia kino kiino kino ki kam bymman tang namar ba ki don ka jingiadei bad kito kiba don ha ka bor.

Ha kajuh ka por pat, ka CSWO bad ka JYF, Women Wing ki pynrem jur halor ka jingshah pyniap jong iwei i heprit kynthei ha Jaitbia Hills. Halor katei ka jingjia ki dawa ba ki bor ka aiñ ba ki dei ban leh ei ei kham kloi khnang ban khanglad ia ka jingkiew stet ki kam bymman ha katei ka Distrik bad wat ha ka jylla hi baroh kawei.

 Web Site Designed and Maintained by SSNetCom Pvt. Ltd.