|
Ban ioh klun jaka, pynsyier ki runar ha Balakhawa, iathuh u Secy. Hima
|
By Our Reporter
Shillong, Lber : Ka jingpyrshang borbah jong ka Assam ban ioh skud ia ki jaka jong ka Meghalaya ban pynheh ia ka jylla la jong ka la poi haduh u pud ba ki don ki kynhun runar kiba shim kabu ban pynsyier ia ki nongshong shnong kiba hap ha kito ki thain khnang ba kin mih noh na ki shnong ba ki sah bad ba kin ioh klun suk ia ki jaka puta jong ki nong Meghalaya.
“Ngi suba ba kadei ka buit jong ka Assam ban pynsyier ia ngi kiba shong ha kine ki thaiń khnang ba ngin phet noh na Balakhawa” ong u Bah Michael Warjri, u nongshong shnong ka New Balakhawa haba ia kren bad ki nongthoh khubor.
Katkum ka jingiathuh jong utei u rangbah uba dei ruh u Secretary ka Nongspung Syiemship, ki runar kiba don haduh 10 ngut ei ei ki la wan ban kawang da ki maw ia ka iingsah jong u kaba don ha New Balakhawa ha ka miet 6 tarik mynta u bnai. Watla ka la don ka jingjulor hynrei da ka jingpoi biang por ki bor pulit ka Khanapara Police Station, ki runar kim shym la ioh lad ban pynjur ia ki kam pyntriem bad pynjulor ia ka iing, ka ophis trei kam jong ka Hima bad ruh ia ka skul kaba don lang ha kajuh ka jaka.
“Ki pulit ki dang iohi ia kitei ki runar ba ki phet sha ki thain Ranibari hynrei ha ka jingdum ka miet kim shym la ioh kem ia ki. Ngi suba ba katei ka jingwan pyndik jong ki kadei beit ki buit ka Assam ban pynsyier ia ngi khnang ba ngi hap ban phet noh bad ba kin ioh klun suk ia ki jaka jong ngi kiba don ha Rani Bari” u la bynrap da kaba iathuh ba ki la wan ruh ban kyrpad sha u Chief Minister ba un phah jingiada khnang ban lait na kino kino ki jingjia ba sngewsih khamtam eh na ka bynta ka jingshong shngain ki khynnah skul bad ki nonghikai.
Copyright mawphor.com
|
