Thursday September 9, 2010
Shillong Edition

By Our Reporter

Nongstoiñ, Lber: Hynnin ka miet, arngut ki samla Khasi kiba kynthup ia u Peter Well Syiemlieh bad u paralok jong u kiba shong basah ha shnong Mawsikar, ia kiba la tip kyrteng kum u German Nonglang ki la shah bom bad shah tied ha ki pulit Assam haban da jem hi jai bad mynta ki don hapdeng ka jingmynsaw kaba jur bha.

Katkum ki khubor ba la iohlum, la iathuh ba kitei ki arngut ki dang wan thap sim na Kper ha ka por janmiet bad katba ki dang mih na khlaw, kynsan kynsan ki la iakynduh ia ki pulit Assam kiba dang iaid pahara ha katei ka por.

Kitei ki pulit Assam ha katei ka por mar ia kynduh markhmat ia kitei ki arngut ki samla, ki la ioh ban kynrup ia u Peter katba utei u paralok jong u, u la ioh ban phet krad ha katei ka por. Ki pulit Assam ki la patrong ia u Peter sha Mawsikar Out Post bad bom ia u ha thanat haduh ba un da mynsaw jur. Utei u paralok jong u, uba la lait phet bad wan beh nadien um shym la lap dien satia, bad haba u la leit wad ia u ha Mawsikar Out Post, u la ngat lang ha ka kti ki pulit Assam bad shah khyrwit ha ban da jem hi jai.

Ha thanat ki pulit Assam ki la phah soi ia u Peter ia kawei ka kot sada kaba khlem satia kano kano ka jingthoh. Hadien ba la dep pynshitom ia ki, ki pulit ki la pyllait noh ia ki bad kitei ki arngut ki la shu par ia iap da ka said ha kaba ki la poi ha kawei ka long Khasi kaba don kham hajan katei ka Out Post ha kaba ki la ai ing basa bad pynsop pynspaiñ ia kitei kiba mynsaw jur.

Ia kitei ki arngut la wan kit sha Hospital Nongstoiñ hynne ka janmiet.

 Web Site Designed and Maintained by SSNetCom Pvt. Ltd.