|
Ioh ‘interim bail ‘u trai Skyline ba pynmih ia ka dur pynthoh bria ia u Trai Jisu
|
By Our Reporter
Shillong, Lber : Ka Shillong Bench Guwahati High Court ka la ai jamin shipor ( Interim Bail) ia u trai jongka Skyline Publishing House u Indra Mohan Jha kaba dei ka kompani kaba pynmih ia ka kot pule Class I ka Cursive Writing Book I ha kaba la pynmih ia ka dur ba pynthoh bria ia u Trai Jisu da kaba pynbat sikret ia u ha kawei ka kti bad ka tin beer ha kawei pat ka kti.
Haba iakren bad u SP jongka East Khasi Hills bah A. Mawthoh u la iathuh ba utei u trai jongka Skyline u la ioh ia katei ka jamin ba shipor na katei ka Iing Bishar da ka jingiasaid jong u nongiasaid ain ba u la thung ban mihkhmat hakhmat ka Iing Bishar bad ka jingioh jamin ka long na ka bynta katto katne sngi.
Ia kane ka jingpynmih thala ia katei ka dur jong u Trai Jisu la lap nyngkong eh da ki nonghikai bad ki bor pyniaid ka St Joseph Girls Higher Secondary School kiba la ujor ruh da ka FIR sha ki bor pulit. Na ka liang ki pulit ka jylla ki la register case halor kane ka jingjia bad ka Iing Bisha Chief Judicial Magistrate ruh ka la ai bor ia ki pulit ban leit kem ia u Jha na Delhi. Ki pulit ki la leit sha ka nongbah Delhi naduh ka 28 tarik u bnai ba la dep hynrei hadien ba la sah shi taiew kim shym la lap dien ia u Jha namar u la phet rieh kumta ki la wan phai noh sha ka jylla ha ka 7 tarik mynta u bnai. Ki pulit ki la lap ba ka iing jongu ha Ghaziabad ka la khang tala bad ki para marjan ki la iathuh ba u la jah rngai la bun bun sngi na la iing. Ki pulit ki la leit ruh sha ka ophis jongka Press jongu kata ha Hasanpur kaba ha nongbah Delhi hynrei kim shym la lap iano iano ruh.
Ia ka case la register kat kum ka kyndon 295 (A) jongka Indian Pnal Code pyrshah ia katei ka kompani Skyline. Wat la u Jha u ioh ia ka Interim Bail hynrei na ka liang ki pulit ka jylla kin iasaid beit hakhmat ka iing bishar na ka bynta ban ioh kem ia u Jha khnang ban ioh tohkit bniah ia u.
Copyright mawphor.com
|
