Thursday September 9, 2010
Shillong Edition

By Our Reporter

Shillong, Lber : Ka Guahati High Court, Shillong Bench ka la pynmih ia ka hukum ba ka Assam kadei ban pynsangeh noh shwa ka jingpyntrei ia ka surok ha Meghalaya hadien ba ka Hima Nongspung ka la ujor pyrshah ia katei ka jylla halor ka nongrim ba ka Assam ka pyntrei ia kitei ki kam pynroi khlem da kynjoh ktien na ki bor shnong ne wat na ki bor pyniaid Distrik ka Meghalaya.

Katkum ka jingiathuh jong u Syiem ka Hima Nongspung, u Paiem Peter Roger Syiemiong, ka High Court ka la pynmih ia katei ka hukum ha ka 05 tarik mynta u bnai ba ka Assam ka dei ban sangeh noh shi syndon ia ka jingwan pynshna surok ha u pud u sam jong ka Meghalaya kaba sdang naduh ka shnong Rani Bari ter ter sha Akhoni Jira, New Balakhawa, Balakhawa bad Bernongsai kaba don kumba 15 km ei ei bad kawei pat ka surok na Rani Bari sha ka shnong Patkang kaba don kumba 5 km ha Nongspung Syiemship, Ri Bhoi Distrik.

“Ngim banse ban ujor sha ka aiñ namar imat lada ap ia ka sorkar Meghalaya ym poi shaei shaei. Ka jingnud ka Assam ban wanrah kam pynroi ha ki thaiñ jong ngi kadei namar ka iohi ba ka sorkar jylla kam ju leh ei ei” la ong u Paiem Peter haba kren bad ki nongthoh khubor ha Shillong Press Club hynne ka sngi.

La pynkynmaw ruh da u Secretary ka Hima, u Bah Michael Warjri ba katei kam dei shuh ka sien ba nyngkong ba ka Hima ka ujor sha ka jylla halor katei ka jingthombor jong ka Assam ia ki jaka ki puta jong ka jylla. “Ngim khang ia ki kam pynroi kiba wan ha ki thaiñ jong ngi hynrei ka jingiaid shakhmat jong ka Assam khlem ka jingpan jingbit na ki bor shnong kumjuh ruh na ki bor pyniaid Distrik ka pynartatien ia ngi ba imat kadei ka buit ban ioh kurup ia ki jaka da kaba shu leh wanrah kam pynroi”.

U Bah Michael u la iathuh ruh ba ki la pyntip bunsien wat sha u Deputy Commissioner katei ka Distrik hynrei ym ju poi shaei shaei ruh katei ka la jia hi kumjuh wat bad u Myntri ki kam khappud pynban utei u Myntri ruh u shu kular khlem leh ei ei.

“Ha ka jingia kynduh bad u Bah Prestone Tynsong u la kular ban pyndep noh ia katei ka kam hapoh ar sngi hynrei ym shym la poi shaei shaei bad tang hadien artaiew ka jingkular jong u ka Assam ka la sddang ban pyntrei sa kawei pat ka surok ha katei ka thaiñ jong ngi kaba sdang naduh Rani Bari haduh Bernongsai” u la bynrap biang.

La iathuh ruh ba ki bor shnong kim ju iohi ia ki Myntri ka sorkar jylla ba kin wan jngoh ia katei ka jingjia pynban la iohi da u Myntri ka sorkar Assam, u Himanta Biswas uba la wan khnang naduh kawei pat ka jylla ban peit ia ka jingeh ki paidbah ka thaiñ bad wanrah syndon da ka surok ban pynsuk ia ki paidbah kiba sah ha kitei ki shnong.

 Web Site Designed and Maintained by SSNetCom Pvt. Ltd.