|
Lap ba jia ka jingiasiat 3 sien ha Muktapur ba leh meng u Colonel ka 21st Bn ka BDR
|
By Our Reporter
Shillong, Lber : Ki heh ka BSF bad BDR kiba la ia kynduh ha nongbah Delhi ki la iatai sani bniah halor ka jingjia jongka jingiasiat ha Muktapur ha Jaintia Hills, Meghalaya kaba la jia haduh lai sien lai wat lynter bad ki la lap ba ka daw jong ka jingiasiat ka dei na ka jingleh meng jong uwei u Lt Colonel u Z.Alam jongka Battalion ba 21 jongka BDR kaba la poi shaduh u pud ban ia pyni bor hapdeng ki arliang mamla ki bor iada khappud jongka India bad Bangladesh.
Hooid wat la ki heh ka BDR kim kwah ban pynpaw ba ka jingiasiat ka dei na ka daw uwei u heh shipai jongki hynrei ka tyllong khubor ba la ioh pat ka iathuh ba ka jingiakren hapdeng ki heh jong ki BSF bad BDR ha nongbah Delhi ka long beit halor ka jingleh meng jong utei u heh shipai kaba la poi shaduh u pud ban iasiat haduh lai sien lai wat.
Ka jingiasiat ba nyngkong eh ka la jia ha ka 4 tarik u Rymphai bad ka daw ka dei namar ka jingpyni bor jong ki BDR lyngba ka hukum utei u Lt Colonel jong ki BDR. La iathuh ba ka daw ba la jia ka jingiasiat haduh lai sien lai wat ka dei beit ka jingleh meng jong utei u heh ki BDR.
Utei u Lt Colonel Alam u dei na ka tnad shipai jongka Bangladesh bad la shu phah ia u shipor ban long kum u Commandant jongki BDR da kaba ai bor ba un long kum u khlieh jongka 21st Battalion jong ki BDR. Ka daw ba la thung ia u ban long kum u nongpeit jong katei ka tnad ka dei namar ba u long uba iajan bha bad ka party Bangladesh Nationalist Party (BNP) kaba dei kawei na ki party kaba pyrshah India bha. Kumta dei na katei ka daw ba u ialeh beit ban wanrah ia ka jingiapher jingmut hapdeng ka India bad Bangladesh da kaba leh beit ia ki kam pyrshah ia ka India. (Yazbeen)
Copyright mawphor.com
|
