Monday September 6, 2010
Shillong Edition

By Our Reporter

Shillong, Lber : U Bah Friday Lyngdoh President ka Meghalaya Pradesh Congress Committee (MPCC) ula ong ba ka Congress Party kam lah satia ban leh eiei ia kino kino ki MLA ne Minister bym dei ki Congress, ba don ha ka Sorkar Meghalaya United Alliance (MUA) lada ki kynthoh ne kren bakla ba pynmong ia kiba bun balang.

“Kino kino ki jingkren pyrshah ia ki Kynthei da u Dkhot bym dei u Congress ba don ha ka sorkar synrop ne Cabinet, ngim don jingkitkhlieh eiei ruh em” ong u Bah Friday haba kren ha ki lad pathai khubor hynne ka sngi ban pynshai ia ki nongrim jong ka Congress ba iadei bad ka kyrdan ki kynthei ha ka imlang sahlang. U Bah Friday ula mih pyrthei ha ryngkat ka Mahila Congress Committee bala ialam da i Kong Ampareen Lyngdoh Myntri ka Sorkar MUA, hadien ba ka AICC kala pan jingpynshai na ka Sorkar MUA ba iadei bad ka jingkren tohmet jong u Dy CM Bah Bindo.M.Lanong ia ki Kynthei.

“Ngim pdiang ia ka jingkren u Bah Bindo. Ngi ai jingmut ia u ban pynkhuid noh ia ka kyntien ba pynmong ia ki kynthei” ong u Bah Friday uba la ong ba ka Congress Party hi ka la treishitom bad kyrshan dohiap ban aibor ha ki Kynthei bad u kam ba dei ka Party hapoh ka jingialam ka Sonia Gandhi, bala wanrah ia ka Bill ba bhah 33% na ka bynta ki kynthei ha ka saiñ hima sima.

Haba kylli kaei ka jingiohi ka Congress ia ka kyrdan ki Kynthei hapoh ka Jylla, ka Kong Ampareen Lyngdoh Myntri ka Sorkar MUA, kala ong ba ka jingeh bad jingshah niewbeiñ ki kynthei hapoh ka Jylla ka long kaba jur bha bad kane kala long ruh ha baroh ki jylla ka ri. Kala ong, ki Kynthei hangne hapoh ka Jylla ki hap ban kit ia ka lyngkor ba khia ba dap satang ki jingkitkhlieh suda, dei namar kane ba donkam ban iakhun ia ka jinglong ryngkat kyrdan hapdeng ki shynrang bad ki kynthei.

Hynrei u Bah Friday Lyngdoh ula ong, haba phai sha ki kynthei Khasi, ki kynthei ki bat ia ka kyrdan kaba khraw tam hapoh ka Jylla (Supreme Position) bad bynrap ba ka Congress kan ieng ban khmih bad pynthikna ba kane ka jingbat kyrdan ki kynthei kan iai neh.

Halor ka jingkylli ba iadei bad ka AICC, u Bah Friday ula ong ka MPCC kam don jingtip eiei ruh em hynrei lehse ki nongialam ba don ha ka Sorkar ki lah ban tip khambha.

Ka Kong Ampareen kala ong, ka AICC ka sngewkhia bha ia ka jingkren tohmet jong u Bah Bindo bad kum ka Party kaba kwah pynurlong ia ka jingpynkupbor ia ki Kynthei, kam kwah ba kum kine ki jingjia kin jia la ka dei ha ka Jylla ne hapoh ka Ri. Kala ong, kum ka Myntri kan sa shimkhia ia kane ka kam ban lah wanrah pat ia ka jingiasngewthuh jingmut.

Na ka liang u Nongthoh khubor ula pyrshang ban ioh iakren bad u Bah Bindo M.Lanong DyCM uba don sha Delhi hynrei um shym la ioh satia ia u. Lah ban kdew ba u Dy CM na ka por sha ka por ula pynshai ia ka jingkynthoh ‘seiñpuh’ da kaba ong ba kane kam mut ba u kren ia baroh ki kynthei hapoh ka Jylla hynrei ka dei tang ia kawei ne kaar kiba lapmiet ban dait bad wohnia beit ia ka sorkar na ka por sha ka por.

 Web Site Designed and Maintained by SSNetCom Pvt. Ltd.