Monday September 6, 2010
Shillong Edition

By Our Reporter

Shillong, Lber : Wat la ka Iing Dorbar Thawaiñ ba halor jong ka ri ka Rajya Sabha ka la mynjur mynta ka sngi ban pyntreikam noh ia ka bhah jong ki kynthei hapoh iing Dorbar kaba long haduh 33 % ( Women Bill 2010) bad kaba sah mynta ka long sa tang ka Lok Sabha ban mynjur ia katei ka Bill, hynrei ha kaba iadei bad ka jylla Meghalaya pat ka tnad Election kan dang hap bishar lada mynjur ia katei ka bill .

“Namar kaei kaba mih ha ki katto katne ki kot khubor ha ki kyndiat sngi kam long kaba shisha namar katei ka bill kam shym la kdew ei ei ruh em ha kaba iadei bad ka jylla Meghalaya ha kaba iadei bad kita ki 20 Constituency na ki 60 Constituency kiba don hapoh ka jylla” ong u Chief Election Officer ka jylla u P. Naiak. “Hooid khlem pep lada katei ka bill ka long ain ne ioh ka jingmynjur na baroh ar ki Iing Dorbar jongka ri, kawei ka seat na ka bynta ka MP Election kan leit beit sha ki longkmie”. “Hynrei halor kane ruh ka tnad Election kan dang hap ban shong bishar namar kaei kaba paw ha ki kot khubor kam long kaba shisha” ban biang u Naik.

U la ong “ ka tnad Election jongka jylla kan dang hap ban bishar bniah ia ki Constituency bad kaei kaba la paw ha ki kot khubor kam long kaba shisha”. U la ong ba ki Election sha ka Assembly hapoh ka jylla ki la long n aduh u snem 1972, 1978,1983,1988,1993,1998, 2003 bad 2008. Kumba long mynta ki don 55 tylli ki Reserved Constituency ne kiba la mang kyrpang bad 5 tylli ki dei ki bym dei ki reserved ne ki bym shym la mang kyrpang.

Kumta u CEO u la ong “ Kan don ka jingpynkylla ha man la ki san snem na ka bynta kita ki 20 tylli ki constituency ba la mang kyrpang na ka bynta ki longkmie”. U la ong “ Kiei ki Constituency kiba la mang kyrpang na ka bynta ki kynthei ha u 2013 kin nym long ki juh ha u snem 2018 jongka Assembly Election”.

U la pynpaw ba halor kane ka jingrai ia ki Constituency ka tnad Election kan dang shong pyrkhat ban shim rai na ka por sha ka por namar ka dei ban don beit ka jingpynkylla ha man la ka san snem ym ban long beit ki juh baroh shi rta. U la pynpaw ruh wat la ia katei ka bill yn mynjur da ka Lok Sabha ruh hynrei ka shong ha ka Iing Dorbar jongka jylla ban shim ia ka rai kumno ban pyntreikam ia katei ka ain hapoh ka jylla.

 Web Site Designed and Maintained by SSNetCom Pvt. Ltd.