Monday September 6, 2010
Shillong Edition

By Editor

Jan man ka sngi ka kyntien ‘shah batbor, shah leh be-i-jot’ ka paw beit ha ki kotkhubor. Katei ka kyntien watla ka dei ka kyntien kaba sngew tohmet, ka kyntien kaba ki mynbarim ki niew ba kadei ka kyntieng sang ban pynpaw wat ha ka imlang sahlang hynrei kumba ka long mynta katei ka kyntien kam pynphylla shuh bad ka kylla long pynban kawei na ki phang kaba u paidbah u la myllen ban iohsngew.

Katei ka kam pohdor lah ban ong, watla ka don naduh ki por ba kham mynshwa hynrei kynrei bha ha kine ki khyndiat snem mynta ha kaba ki nongbat bor ki lah ban long marwei ne ha ka kynhun ki la duh noh ia kata ka mynsiem ka jingsngew lem khlem khein shuh ia ki khynnah kynthei kiba dang lung ha ka karta kum 5 snem ter ter haduh ki tymmen ki kro ruh ym don jingmap.

Ka bat bor ia ki kynthei ka long kaba jubor ban pyrkhat namar ka jingrung ka mynsiem bym tip briew ne ka mynsiem jong ka jingkwah pynjot ia kiwei pat ki bym don ia ka bor, namar ka ktien ka ong, “ u shynrang u don 12 bor katba ka kynthei ha ka jinglong lui lui jong ka hi ka don tang shibor “ kumta lada bun ngut ki shynrang ki bat bor shano ka kynthei bapli kan leit kam don ia ka bor ban ksaid lait noh katto katne ngut ba ki lait na ka tyrsim ki nongbat bor kaba ki lait da ka buit ym da ka bor,don kiba lait da ka jingpyrta briew don kiba lait da kaba ki shu dait bad kumta ter ter.

Hooid ka don ka Meghalaya State Commission for Women ne wat ka CSWO kiba don ia ka mynsiem ban iarap ia kine ki kynthei kiba ngat ha ka tyrsim jong ki nongthom bor hynrei katta kane ka kam kala nang kynrei katba nang mih ki sngi namar ka jingiaid ka por jong ka jingsniew kaba ki tymmen kila iathuh bad iohi lypa ba ki sngi kiba sniew kin wan na kawei ka por sha kawei ka por, kat kum ka jingiaid ka juk kaba mynta.

Kawei kaba lah ban kdew hangne ka long ba ym dei ban bein ia kishynrang ne ia ki kynthei hynrei baroh ar ki long ha kajuh ka kyrdan, namar ban shu kdew hangne ka por kala dei ia ki kynthei ban iaid bad riam don burom khnang ba ki shynrang kin mynrain ban kynshlein kumjuh ban rung ia ka mynsiem ka jingkwah brai ka doh u briew.

Kumjuh na ka liang ki shynrang ruh kila dei ban pyrkhat bad puson bha hato lada nga leh ia kane ka kam ka biang mo?, hato ha iing ha sem ym don kynthei?, hato u briew ne ka briew ki wan sha ka pyrthei khlem don ki kmie ki kpa, hato ju don mo ba pyrkhat shuwa ban leh ia kano kano ka kam lada ki pyrkhat kan ym jin dala mih kata ka mynsiem jong ka jingkwah brai ka doh, namar ym lah ban len ka jingkwah brai ka mih na ka jingmut jingpyrkhat kaba ym treikam hok shuh la ka long ha ka por mynsngi ne ha ka por mynmiet, kumta donkam ban wad ia ki lad ki lynti kumno ban teh lakam ia kane, namar kaei kaei baroh ka dang na ka thliew iing kaba ngi mih man la ka sngi.

Khnang ba yn lah ban kham pynduna ne teh lakam ia kine ki jait kam donkam ka jingiatreilang naduh ki samla, ki Seng Samla, ki Dorbar Shnong, ki Sengbhalang bad ki pulit kiba dei ban bat ia ka ain, lada kine ki iatreilang kam don jingeh ban kem ia ki briew kiba donkti kum ha kine ki kam pyn jaboh ia ka jaidbynriew kaba rit paid.

Kawei tang shu dep ia ka jingjia kim dei ban lehrain ban iathuh ia ki jingshisha baroh wat la ki don ki khep ba ki shah byrngem byrsit hynrei shisien ba don ia ka mynsiem ba jwat ban iathuh ha kino kino kiba sngew shaniah iaid sha khmat khnang ba ki briew kiba leh ia ka kam sniew bad jyrsieh kin thngad shisha ban leh ia ka khamtam ban pynkloi ia ka jingkem da ki pulit bad register case pyrshah ia kine ki briew kiba nud ban leh ia ka kam sniew kam smeh.

Na ka liang ki pulit kila dei ban don ka kyndon kaba eh bha kum ia kine ki briew kiba leh ia kine ki jait kam, wat la ka dei ban amend ia ka police act kam pher tangba ki dei ban ioh ia ka jingsneng kaba kin sngewthuh ha ka jingim jong ki, kumjuh na ka liang ka Iingbishar ka dei ban shim khia bad bishar hok khnang ba yn pynngat ia ki ha ka kyndon shah set along kaba biang bha. Tang hangne shisha kane ka kam awrisa ka lah ban jah rngai bad duh dam na kane ka snieh pyrthei.

 Web Site Designed and Maintained by SSNetCom Pvt. Ltd.