Monday September 6, 2010
Shillong Edition

By Our Reporter

Shillong, Rymphang : Ka Dorbar Shnong Lum-daitkhla kaba la long ha ka 6 tarik Rymphang 2010 ka pynpaw ka jingsngewsih kaba khraw hadien ba u Rangbah Shnong (RS) ula kren pdiang bad aiti ha u Chairman ban pyniaid ia ka Dorbar. Hynrei shwa ba u Secretary un pule ia ki mat (agenda) ban iakren, u paidbah ula kyndit ban iohi pynban ia laingut ki pulit kiba wan ban pahara ia kane ka jingshong Dorbar jong ka Shnong kaba don hapdeng jong ka jingsuk.

Hadien kane na ka liang u paidbah ule ieng ban kylli mano bala phah ia kitei ki pulit sha kane ka jaka pynlong dorbar, hynrei na ka liang u Rangbah Shnong ula pynpaw ba um don jingtip ei ei bad kumta u paidbah ula dawa na u Chairman ban pynwai noh ia ka Dorbar namar kim lah ban shong Dorbar lang bad ki pulit.

Ka Dorbar Shnong ha ka kyrwoh lyngba u Rangbah Shnong, Bah T. Marbaniang bad Secretary, Bah J.S. Ramshng la ong ruh hadien bala wad jingtip na u Basan ka Shnat Raid Mawpat uba peit ia kane ka Shnong, u Basan ruh ula pynpaw ka jinglyngngoh halor kane bad ong ruh ba lada donkam ban leh kumta hapoh ka Dorbar na ka liang jong u udei ban tip.Hadien kane la pyntip ruh sha u SP ka Ri Bhoi District, hynrei na ka liang jong u ruh ula ong ba um don jingtip ei ei.

Kumta na ka liang ka Dorbar ka pynpaw ka jingsngew lyngngoh halor kane ka jingjia kaba kham phylla ka bym ju jia mynno mynno ruh ha ka Dorbar Shnong U Khasi kaba ju khot ka Dorbar Blei, ha kaba ym ju shah shong Dorbar ia ki kynthei ne ki soh shnong, ban tip ia ka kam iap kam im jong ka Shnong, hynrei dei tang u nongshong shnong ba para uba don hok ban shong ha ka Dorbar.

Shuh shuh ka Dorbar bad ka Executive kala rai ruh ban wad haduh ban da lap ia ki jingshisha baroh mano bala phah ia kitei ki pulit sha katei ka Dorbar, bad haduh yn da la ioh ia ka jubab da ka jingthoh yn sa pynlong pat ia ka Dorbar la kalong ha kano kano ka por ruh.

 Web Site Designed and Maintained by SSNetCom Pvt. Ltd.