Monday September 6, 2010
Shillong Edition

By Our Reporter

Shillong, Rymphang : Ka Meghalaya Social Programme Welfare Development Organisation (MSPWDO) ka dawa ba ka sorkar ka dei ban don noh da ka ain kaba pyrkhing ia ki MLA kiba bam klep ia ka skim u paidbah bad kadei ruh ban pynduh shi syndon ia ka jingieng kyrtong sa shisien pat ne wat ban buh da ka ain ban set along haduh lai snem kynthih ia kito kiba pynkhein ia ka.

Ha ka kyrwoh, ka Seng ka la dawa ba lada ka sorkar ka lah ban don da ka ain ban mana iaki sengbhalang tang namar ba ki pyrshah sorkar kumta kadei ruh ban don da ka ain kaba kham pyrkhing da kaba set along lai snem kynthih ne wat haduh 7 snem ia uno uno u kyrtong uba pynkhein ia katei ka ain thymmai.

Ha kajuh ka por ka pynkynmaw ruh ba ka jingong thoh u Myllung So So Tham kaba kdew shai ba ki trai shnong trai muluk k ilah ban long ki mraw, ki nongthoh dieng bad ki nongtong um jongno re jongno ka la urlong naba ki heh ki hain ki ailad bad i kumba ki nangkhot ia ki mynder ban long ki syiem ki patsha ha kane ka ri.

Ka Seng ka dawa ruh na u Myntri ba dei peit ia ka Law, u Bah Bindo M Lanong bad kumjuh ia u Myntri Rangbah ka Jylla ba ki dei ban don shna noh mardor ia kitei ki ain ban khanglad ia ki nongmihkhmat paidbah kiba bamsap ia ka skim ki paidbah.

Na ka liang ka Seng ka byrngem ruh ba kan iaid buddien ia shibun ki skim kiba dei jong u paidbah bad ka la maham lypa ba lada ka lap kan sa dawa na ka sorkar kaba ha khlieh duh ban ai da ka jingpynshitom ne ban pan ia ka ain ba kyrpang ia kito ki nongmihkhmat.

Kane ka long katkum ka kyrwoh ba la phah da u President ka Seng, u Bah Kitbok Thabah.

 Web Site Designed and Maintained by SSNetCom Pvt. Ltd.