Monday September 6, 2010
Shillong Edition

By Our Reporter

Shillong, Rymphang : Ka Myntri ka tnad pule puthi ka Jylla, ka Kong Ampareen Lyngdoh ka la kyntait war ia ki jingkynnoh ba ka tnad Education ka leh thurmur bad leh mon ha kaba iadei bad ka result jong ka interview ia ki post Asst. Teacher ha ki Govt. LP School Jowai

“Ai ba ka rai jong ka Iingbishar kan pynhun ia ki” ka la ong ha kaba iadei bad ka jingbyrngem jong ki samla kiba khlem shah jied ha katei ka interview, ban ujor syndon sha Iingbishar pyrshah ia ka Education Department halor ka nongrim ba katei ka tnad ka la leh thurmur ha kaba pynmih ia ka result.

“Ngim lah ban pynhun lut ia baroh namar ki don tang 111 tylli ki post katba ki kyrtong ia khun ki don haduh 526 ngut” ka la ong. Katei ka Myntri ka iathuh ruh ba ka sorkar mynta ka dang pynkhreh sa kumba 600 tylli ki post na ka bynta ka kam hikai. ‘Ngin pyrshang ban kynthup lang ia kito kiba pass ha katei ka thup” ka la bynrap biang.

Katei ka Myntri ka la pynkynmaw ba ka thong jong ka sorkar hi ka long ban ai a jingshakri kaba bha tam ia ki khynnah pule jong ka jylla ym da kumwei pat bad dei na kata ka daw ka jingjied ia ki nonghikai ruh ka long katkum ki kyndon.

“Nga pyrshah jur ia ka jingkynnoh ba kito kiba paw kyrteng ki dei ki bym biang ki kyrdan kumba ki ong hynrei lada ki kwah ia ka jubab kaban pynhun ia ki ai kin leit sha ka Iingbishar” ka la ong da kaba pynpaw ruh ia ka jinglyngoh kaba khraw ba kat katei ka jingbun ki nongwan interview thik thik ki tip ba don ki ba khlem wan interview hynrei ki shu pass bad paw kyrteng.

 Web Site Designed and Maintained by SSNetCom Pvt. Ltd.