|
Kurup dawai 25 lak ki Custom
|
By Our Reporter
Shillong, Rymphang : Ki Ophisar ka Custom kila ioh ban kurup ia ki dawai jyrhoh Phensidryl ba shongdor 25 lak tyngka na kawei ka trok ba wan na Bihar bad thmu khaii sha Bangladesh.
Ki Ophisar ka Custom hadien ba ioh jingtip ba bniah bha, kila apshrip hynnin ka sngi ha ki thaiń ka surok National Highway 40 Shillong- Guwahati bad kila kem beit beit ia kane ka trok bad lap ba ka kit ia 35000 tylli ki bitar dawai codeine-Phensidryl bala song bad buhrieh bha ha ki byrni phan.
Kine ki Ophisar kila kem noh ia u nongniah bad u nongbud jong ka trok na ka bynta ban pynlong ia ka jingtohkit. Nalor kane, kila hiar ruh sha Guwahati ban kem ia u trai uba treikam khaii ha Guwahati hynrei la ong ba une u briew ula phet krad bad khlem lapdien satia.
Ia kine ki dawai ba shongdor 25 lak, la wan kit na Bhagalpur bad thmu ban khaii sha Bangladesh lyngba ka Agartala. “Ia kine ki dawai la ju thied na Bihar, UP bad Delhi. Ka Shillong ka dei tang ka jaka iaid lynti ban khaii sha Bangladesh” ong ki Ophisar ka Custom kiba la ong, kane ka jingioh kurup dawai ka pyni ba ka jingiakhaii tuh ia ki dawai drok ka dei kaba jur bha ha kane ka thaiń bad la bun ki sakhi ha ki snem bala leit noh.
Copyright mawphor.com
|
