Monday September 6, 2010
Shillong Edition

By Our Reporter

Jowai, Rymphang : Ka Balang Unitarian ha Puriang ka la kynjoh 100 snem bad ia kane ka jingdap 100 snem katei ka Balang la rakhe pyndon burom ia ka ha ka juh ka sngi ba la pynlong ia ka Annual Conference ki Balang Unitarian Khasi Jaintia bad Kharbi-Anglong, Assam kaba la long ha ka 6 bad 7 tarik une u bnai ha katei ka Balang.

Ha ka jingshisha ia kane ka jingdap shispah snem katei ka Balang la rakhe bad lehkmen ha baroh shisnem lynter ia kane ka jingrakhe bad lehkmen la pynhap pyrda noh ha kane ka 6 tarik ha ka jingiasenglang kaba la long ha Madan ialehkai ka shnong Puriang.

Ha kane ka sngi la iadonlang ruh ki nongmih khmat ka Balang Unitarian kiba na bar ri kynthup ia u Richard Vaiduizend, uba dei u President jong ka Unitarian Universalist Partnert Church Committee, USA. U Richard u la pyllait paidbah ruh iaka thup buh jingkynmaw –ka souvenir jong ka Balang Nalor u Richard ki don haduh 5 ngut kiwei pat ki nongmihkhmar kiba la mihkhmat na ka Unitarian Universalist Congregation of Fairfax, Virginia.

U Tom Ewing jong ka Unitarian Universalist Church of Ann Arbor Michigan u la ai jingkren ha katei ka sngi ba kyrpang ka Balang Puriang.

Hadien ka jingpynhap noh ia ka pyrda ka jingrakhe dap 100 snem ka Balang Puriang church, U Pastor Rev. C. Lyngdoh u President bad rim ka Union of Unitarian Churches u la pynher ia ka lama na ka bynta ban sdang sa ia ka Annual Conference ba 110 jong ka Balang Unitarian hapoh ri Khasi Jaintia bad Karbi Anglong, Assam.

Da ki hajar ngut ki riewngeit na kylleng ki balang Unitarian bapher bapher ki la wan tuid sha ka madan ha Puriang ban ia shim bynta ha ki jingiaseng baroh shisngi.

Haba kren ha ka jingiaseng bah, u R. Pariat u la ong ba ka Balang Unitarian kadei ka Balang kaba kyrmen ia kaba bha na ka bynta ka lawei. Da kaba shim na ka jingkren u Riewniam ba khraw ka Balang Unitarian uba na USA, u Pastor John Murray, u bah Pariah u la pynkynmaw ia ki riewngeit ba u la khot ia ka ban ia sam lem ia ka jingiohi jngai sha kiwei pat bad ban ia sam ia ka khubor ka jingpynshlur bad ka jingkyrmen.

 Web Site Designed and Maintained by SSNetCom Pvt. Ltd.