Monday September 6, 2010
Shillong Edition

By Our Reporter

Shillong, Rymphang: Ka sorkar jylla ka la kyntait ia ka jingai jingkhein jongka Planning Commission (PC) ia ka jingdon kiba duk ba kyrduh hapoh ka jylla.

Haba iakren bad u nongthoh khubor na ka liang ka myntri ba dei peit ia ka tnad Supply ka kong Ampareen Lyngdoh ka la iathuh “ Ka jingdon kiba duk ba kyrduh ha ka jylla kat kum ka jinglum jongkhein ka sorkar ka long haduh 40.86 katba ka PC ka pynapw ba ki don tang 18.5 %.

Kane ka long ka bym shisha satia namar kat kum ka jinglum jingkhein da ka tnad Rural jong ka sorkar jylla ka la shem ba ki don haduh palat 2 lak ngut ki longiing kiba dang don hapdeng ka jingduk jingkyrduh tang ha ki thain nongkyndong bad tang ha Shillong ruh ki dang don sa 10,615 ki longiing kiba dang hap hapoh ka BPL.

Kumta ka kong Ampareen ka la pynpaw ba ka long kaba bakla shi katdei eh ban pynduna ia ki longiing kiba duk ha kane ka jylla namar kane kan ktah jur ia ka jylla namar kiba duk ki dang bun palat namar khlem pep lada pynduna ka jingioh bynta ia ki mar bam ruh kan duna khamtam ha kum kane ka por ba kiew dor palat ki mar ki mata.

Ka la pynpaw ba wat ang mynta ruh kata naduh u Kyllalyngkot 2008 tad haduh u Nailur 2009 ka jingioh shini ka jylla ka long tang 38 % na kaei kaba ka dei hok ban ioh. Nalor kane ka la pynpaw ba ka don ka jingduna ha ka jingioh khaw jongka jylla lyngba ka Public Distribution System ne khaw rashon kaba long haduh 1,03,116 Matric ton bad ka shini ka long haduh 23,448 matric ton.

 Web Site Designed and Maintained by SSNetCom Pvt. Ltd.