Monday September 6, 2010
Shillong Edition

By Our Reporter

Shillong, Rymphang : Ka Coordination Committee on International Border (CCIB) ka ai ka jingiaroh ia u Myntri Rangbah ka Jylla, u Dr. DD Lapang uba la nud ban pynpaw hakhmat ka sorkar kmie ia ki jingeh ba ki paidbah nongshong shnong kiba sah ha khappud ka Bangladesh ki ia kynduh khamtam ha kaba iadei bad ka jingker sainar shiah.

“Lada ka jingkular jong utei u Myntri ka sorkar kmie ban shimkhia halor kitei ki jingeh ba la pynsngew da u Myntri Rangbah ka urlong ha ki 60 sngi, ngin dap da ka jingkmen kaba khraw bad tyrwa ruh ia ka jingiatrei lang ryngkat ryngkat bad ka sorkar” ong u Bah GH Kharshanlor, nongai kiten ka CCIB haba ia kren bad u Mawphor.

Ka CCIB ka ong ruh ba katei ka jingnud jong u CM ban pynsngew ia katei ka jingeh ha katei ka jingialang jong ki Myntri Rangbah, ha kaba la don lang ruh u Myntri ka tnad kam pohiing, u P Chidambaram bad ruh u Myntri Rangbah duh ka Ri, u Manmohan Singh, ka dei kaba ha khmat eh ba ka Seng ka la thrang la slem bha ba kan urlong noh.

“Katei, lada ka treikam kan long ka jingkyrkhu kaba khraw ia ki paidbah kiba sah ha ki khappud” u la bynrap biang.

Ha ka jingialang kaba long ha kane ka sngi u Blei, u Myntri Rangbah ka Jylla u la pynsngew ruh ba bun ka khyndew kaba sboh jong ka jylla ka la hap noh sha bar jong ka jingker sainar shiah kaba long haduh 150 meter ei ei na u Zero Line. Nalorkata, ha ki bun ki jaka ka jingker sainar shiah ka long palat wat ia ka 150 meter, dei na kata ka daw ba ki paidbah kiba sah ha kitei ki thain ki don ha ka jingbynniaw kaba khraw ba ioh kim lah shuh ban leit rep leit riang sha kito ki lyngkha kiba don shabar jong ka jingker sainar shiah.

Ha katei ka jingiakren ka la don ka jingpynbeit ban don noh da ka High Power Committee ban peit halor kitei ki jingker sainar shiah khnang ba kan lah ban iada ia ka shongsuk shongsain bad ka hok jong ki paidbah kiba don ha ki khappud.

 Web Site Designed and Maintained by SSNetCom Pvt. Ltd.