Monday September 6, 2010
Shillong Edition

By Our Reporter

Shillong, Rymphang : Ia ka Meghalaya House ba ar jongka Meghalaya ha nongbah Delhi kaba la tei ha Vasant Vihar, New Delhi yn plie bad pyntreikam noh hapoh ka 31 tarik u Lber mynta u snem.

Haba iakren bad u Myntri ka tnad GAD u bah Paul Lyngdoh mynta ka sngi u la iathuh ba u la leit jurip hi da lade ia katei ka iing bad shem ba hapoh u Lber la lah beit ban pyndep bad pyntreikam ia ka.

Ha kane ka jingleit jurip mynta ka sngi la synran lang ia u Myntri da u Commissioner bad Secretary ka GAD u bah P.W Ingty, u Chief Engineer ka PWD ( Building) lem bad ki trai jongka Gupta Brothers ba na Delhi kiba tei ia katei ka iing.

Haba iakren bad u Mawphor u bah Paul u la iathuh u hun bha ia ka jingiaid shakhmat jongka kam bad na ka liang katei ka kompany kaba tei ruh ka la pynpaw ba kan pyndep beit hapoh ka 31 tarik u Lber mynta u snem.

Kane ka jingshim khia jong u Myntri ban leit jngoh ne jurip hi da lade ia katei ka Meghalaya House ba ar ka long halor ka nongrim ba ka Meghalaya House kaba don mynta ha Aurangzeb Road, New Delhi ka la khapngiah palat ia ki nong Meghalaya kiba leit donkam sha katei ka nongbah khamtam ia ki samla pule kiba donkam ban sah shipor katba kim pat ioh jaka sah ha ki jaka pule jongki.

Dei na kaen ka daw ba u la shim khia ban leit jngoh bad peit ba dei ban pyndep kloi noh ia ka jingtei.

Kane ka Meghalaya House ba ar kan don ar tylli ki kamra na kabynta ki VVIP. 15 tylli na ka bynta ki Minister ne ki ophisar kiba leit donkam sha Delhi bad ar tylli ki kamra ban iathiah paidbah ba lah ban ngiam haduh 30 ngut ei ei.

 Web Site Designed and Maintained by SSNetCom Pvt. Ltd.