Monday September 6, 2010
Shillong Edition

By Our Reporter

Shillong, Rymphang : Ka jingkiewdor ki ki marbam mardih ha ka Ri ka la nang pyrsyrtok shuh shuh da ka jingnang kiew kiba duk ha ka Jylla, la pynpaw ka Myntri ka tnad Food bad Civil Supply ka Meghalaya ha ka jingialang ki Myntri Rangbah ka Ri ha Delhi.

“Ka Planning Commission ka la kdew shai ba ka jingdon kiba duk ha ka Jylla ka la kiew haduh 40.86% kaba long bun shah bha lada ia nujor bad u snem 2004-2005 kaba long tang 18.5%” ka la ong haba ia kren bad ki nongthoh khubor ha kamra treikam jong ka.

Ka la ong ruh ba katei ka jinglap lyngba ka jingwadbniah da ka State Rural Department ha u 2002 ka la lap ba ki don palat ar lak ngut ki nongshong shnong kiba hap hapoh u lain ba duk (Below Poverty Line) kata ruh tang ha ki nongkyndong.

“Ha sor ka jingdon jong kiba duk kata tang ha Shillong tad haduh mynta kam shym la duna ia ka 10,615 tylli ki longiing” ka la bynrap biang.

Katei ka Myntri ka la pynpaw ruh ba kam long satia kaba suk ban pynduna noh ia ka jingdon jong ki longiing BPL ha kaba iadei bad ka bhah mar bam nalor kata ha ka por ba ka jingkiewdor ruh ka jur bha.

Ha kaba iadei pat bad ka jingkiewdor ka shini, ka Kong Ampareen ka la iathuh ba naduh u Kyllalyngkot 2008 haduh u Nailur 2009, ka Jylla la iohpdiang tang 38% ka bhah bam ba ki ju ioh barabor.

Kumta, halor kitei ki phang ka la kyrpad ia ka sorkar kmie ba kan kynthup lang noh ia ka jingsam ia ki jingbam symbai bad ka umphniang ruh lyngba ki FCI naba tad haduh mynta ka Jylla ka duh ia kitei ki marbam tang namar ba ka Jylla kam don la ka jong ka State Food Corporation.

“Ka la don ka jinghiar kynsan haduh 1, 30, 116 Metric Tonne (MT) u khaw ha ka jylla lada ia nujor bad ka jingdonkam kaba kot haduh 4, 38, 000 MT shi snem shi snem” ka la ong bad bynrap ba nalor kata ka Jylla ka lah ban pynmih tang kumba 2,03, 485 MT ha ka shisnem.

Man ka u snem ka Jylla Meghalaya ka donkam haduh 34,400 MT ka shini katba nalade pat ka lah ban pynmih tang kumba 212 MT u pai shini ha ka shisnem.

Kumba ka long hi, ka jingioh ia ki marbam kum u khaw lyngba ka Public Distribution System (PDS) ka long tang 1, 03, 116 MT ha ka shisnem katba ia ka shini pat tang kum 23, 448 MT ha ka shisnem.

Da kaba sngewkhia ruh ia ka jingiapher kaba jur bha hapdeng ka jingdawa bad ka jingduna ka jingpoi ki marbam, ka Kong Ampareen ka la iathuh ba lem bad ka kynhun ki heh sorkar katei ka tnad kin pyrshang borbah ban kyrpad ia ka sorkar kmie ban bhah kham bun ka mang marbam ia ka Meghalaya. “Ngi kyrmen ba kane kan iarap ia ki nongkhaii ban ym ioh shim kabu ia ka jingbym lah jong ka sorkar ban pynbiang ia ki paidbah” ka la ong.

 Web Site Designed and Maintained by SSNetCom Pvt. Ltd.