Monday September 6, 2010
Shillong Edition

By Our Reporter

Shillong, Rymphang : Hadien ka jingjia Tympang Club, Iawmoosiang 2009, u Dy Superintendent of Police (Hqr) Bah Bijen Laloo ula ngat biang sa ha kawei ka jingkynnoh thombor bad ktah kti ia ki riew paidbah bad mynta ka kynti kala jia ia u Education Secretary jong ka Federation of Khasi Jaiñtia & Garo People (FKJGP) Central Body.

Une u Education Secretary ka FKJGP u dei u Bah Kynsai War, uba la mynsaw ha ki bynta ka khmat bad ka khlieh na ka jingkura bad tied tdong suloi da une u Ophisar ba dang shu pass ia ka eksam MPS kaba khatduh eh. U Bah Kynsai ula mudui da ka First Information Report (FIR) pyrshah ia utei u Heh Pulit bad dawa ba ka Aiñ ka dei ban pynshitom ia u.

Kat kum ka First Information Report (FIR), u Bah Kynsai ula iathuh ba hynne ka step por 10.30 baje katba ma u (Kynsai) i dang leit buh iala i Kurim da ka Maruti Van, ban shim dawai na kawei ka Clinic hajan Bethany Hospital, kawei ka Gypsy Pulit bala niah da u Bijen Laloo kala wan bad beit beit kila hylla ba u pynieng kali hakhmat Hospital, kaba dei ka No Parling Zone. Hynrei ha kane hi ka por, uwei u Pulit Special Operation Team (SOT) ula hiar na ka Gypsy bad rung hapoh ka Van bad bthah ban niah beit beit sha Laitum-khrah Police Station (Traffic Branch).

Lah ban kdew une u Ophisar Pulit Bijen Laloo u dei ruh uba la don jingiakajia bad u paidbah ha ka Shnong Tympang Club ha u Kyllalyngkot 2009, na ka jingktah kti bad shoh ia arngut ki nongkitkam jong ka Dong. Ki paidbah kane ka Shnong kila pynlong ia ki jingiakhih da kaba sieh bannar bad lama iong ha baroh kawei ka kyntoit. Ha kane ka jingjia, ki paidbah kila kynthoh jur ruh ia une u Pulit ha ki bannar ba ong “Phah ia u DSP BJ Laloo ban iakhun bad ki kaikhlaw ym ban khien kaikhlaw iangi”, wat pynthut ia ka shongsuk shongsain ka nongbah Jowai”. Ka Shnong kala dawa na ka Sorkar ba thung Judicial Inquiry bad ban kynriah kam ia une u Heh Pulit.

U bah Kynsai u kynnoh, hadien ba poi ha thanad, u Bijen Laloo ula ialam beit beit sha ka kamra ki Ophisar bad hangne ula bom la kura haduh ba la mynsaw bad khlieh bad khmat. Ula kyntu kum u Nongialam Sengbhalang ba dei ban leh da kaba tyngeh ia kum une u Pulit shoh briew bad uba pyntieng pynsmiej ia ki paidbah da ki jinglong basniew khnang ba ki paidbah kin ai ka jingshaniah ha ki Pulit.

U Bah Kynshai ula ong, “Nga tip ka dei ka jaka bym shah ieng kali, hynrei haba nga pynhiar ia i Nongpang haduh katno eh kan pynkhapngiah ia ka surok.... ka ktien kam biang mo ban iapynbeit”. Ula ong,une u DySP ula shaiñ kuna ruh haduh 500 tyngka ba pynieng ia katei ka kali ba tang da ki minit bala pynbud pat da ka jingleh dusmon khlem nongrim.

I Kong Claudia Lyngwa Superintendent of Police (City) i ong, une u dkhot ka FKJGP ula pynkheiñ ia ki kyndon niah kali (traffic rules) bad la rah ia u sha thanad halor kane ka daw. I iathuh ba ki Pulit kila dain kuna ba 500 tyngka bad hadien la pyllait noh ia u.

 Web Site Designed and Maintained by SSNetCom Pvt. Ltd.