Monday September 6, 2010
Shillong Edition

By Our Reporter

Shillong, Rymphang : U Bah Ardent Miller Basaiaw moit, MLA Nongkrem, udei u nongmihkhmat ba nyngkong eh ban pyllait paidbah ia ka MLA Scheme na ka bynta ka snem 2009- 2010.

Ia kane ka skhim ba 60 lak tyngka kaba dei ka jingpyllait pisaba nyngkong jong ka sorkar, la aiti sha ki paidbah mynta ka sngi ha ka jingialang kaba la long ha Lad Nongkrem ha kaba da ki hajar ngut ki paidbah ki la wan ban sakhi lang ia kane ka jingpyllait skhim. La iadon lang ruh ki BDO na Mylliem Block, Mawrynkneng Block bad Mawkynrew Block bad kumjuh ruh ki ophisar na ki tnad treikam bapher bapher.

Na kane ka 60 lak tyngka ka skhim, 103 ngut la ioh jingiarap mar 30 hajar tyngka napdeng ki briew kiba duk ba kin shna ia ki iing la jong. Nangta 486 ngut la ioh jing iarap da ki nongrep na ka bynta ba kin pynbha ia ka rep ka riang jong ki. Artylli ki skul, ka Seng Khasi Secondary School, Smit kaba ioh 2.55 lak bad ka Salem Secondary School, Kynton u Mon kaba ioh 2.25 lak tyngka.

Ka skhim jong ka snem 2008- 2009 pat ka long mar 25 hajar tyngka ia ki 20 tyll ki Balang bad Seng Samla Balang bad 30 tylli ki Sports Club mar 7 hajar tyngka bad san tylli pat ki ioh hapdeng 5 hajar, 10 hajar bad 15 hajar tyngka.

Haba pynshai ia ki paidbah, halor kane ka jingai skhim, u Bah Ardent, u la ong ba u la shim ia ka rai naduh shuwa bad hadien ba u jop elekshon ba un nym ai satia tang ia ki briew kiba kyrshan ia u, hynrei un leit lang ia baroh ki paidbah kiba dei hok ban ioh jingiarap na ka Constituency jong u khlem da ñiew shiliang iano iano ruh.

“Hooid, ha ka jinglong briew haba wan kiba khlem kyrshan ka don ka jingsngew dom bad sngewbuhnud, hynrei nga ainguh ia U Blei ba U la weng noh ia kane ka mynsiem pyrkhat hanga”, la ong u Bah Ardent.

U la pynpaw ruh ba um dei u briew uba buhnud bad pynhiar kput, hynrei haba u la long MLA, u long nongmih khmat ia baroh ki paidbah jong ka Constituency.

Ha kajuh ka por u la kyrpad ia kito kiba ym pat ioh jingiarap ha kane ka khep ba mynta ba kin iai shah bad ap ha kawei pat ka khep ynda ka sorkar ka la mang pisa.

Ia ki work order jong ki skim bapher bapher, la iarap pynsam lang da ki BDO kiba don lang ha kane ka sngi bad ki MDC jong ka KHNAM, u Bah Adelbert Nongrum, Bah James Ban Basaiawmoit, Bah Latiplang Kharkongor bad Bah Carmel Sohtun, MDC ka UDP.

 Web Site Designed and Maintained by SSNetCom Pvt. Ltd.