Monday September 6, 2010
Shillong Edition

By R.L.Lyngkhoi

Shillong, Rymphang : Jan baroh 46 ngut ki MLA ba don ha ka Sorkar Meghalaya United Alliance (MUA) kyn thup ki 12 ngut ki Minister, kila ioh ban klun ei kha ma kha ia ka pisa u paidbah ba kot da ki lak tyngka ha ka shi-bnai na ka jingtyrwa kali light saw ka Secretariat Administration Department (SAD).

Ka Secretariat Administration Department (SAD) ka ju ai bhah kali ia ki MLA ba don hapoh ka Sorkar Jylla, kiba la shah jied ban long ki Minister, ki Parliamentary Secretary, ki Chairman bad Vice-Chairman haduh ki Ophisar, hynrei ia kine ki kali la lap ba bun ki MLA ka MUA kila kyn tait ban shim ne pyndonkam naba ka don ruh ka bhah tyngka bai wai kali ba ka SAD ka buh ia kiba kyntait. Ka baiwai kali ba ka SAD kala buh ia ki Minister ka dei 600 tyngka shisngi bad ia ki Parliamentary Secretary haduh ki Chairman bad Ophisar ka long 400 tyngka shisngi.

Ha ka jingtohkit u Mawphor la lap ba jan baroh kine ki MLA ka sorkar MUA kim ju shim satia ia ki kali na ka SAD da kaba aidaw ba ki kali kim dei kiba paka bad aidaw kumne kumtai bad kila jied ban kner ei ia ka baiwai ba kane ka tnad kala buh. Ha ka shibnai uwei u Minister u kamai kha ma kha na ki kali ka SAD haduh 21000 tyngka katba ki Parliamentary Secretary bad ki Chairman ki ioh kamai 12400 tyngka shibnai.

Ka Secretariat Administrative Department (SAD) ka don ia kumba 60 tylli ki kali mynta ba ai sha ki Minister, Parliamentary Secretary, Chairman bad ki Ophisar, hynrei kham bun kim ju shim satia ia kine ki kali ban pyndonkam, ong u P.Naik Principal Secretary ka SAD haba ia kren bad u nongthoh khubor. U ong, kine ki Heh Sorkar ki ju jied ban shim da ka baiwai ban ia ki kali nalor kata u ong “ka SAD ka ju thied kali manla u snem, kaba long kat kum ka jing kwah bujli jong ki Khlieh Nongsynshar”.

Kat kum ka jingkheiñ bala ioh na Secretariat, saw ngut napdeng ki 12 ngut ki Minister ka MUA kila kyntait ban pyndonkam ia ki kali ka SAD, kumjuh ruh 7-10 ngut ki Parliamentary Secretary napdeng ki 13 ngut bad bun ngut ki Chairman, Co-Chairman bad Vice Chairman kiba don ym duna ia ka 100 ngut. Kine baroh kila jied da ka baiwai ka ban kot da ka phew klur tyngka lada kheiñ lang ha ka shisnem.

Ha ka jingtih bniah u Nongthoh khubor, la lap ruh ba bun ki Minister, ki Parliamentary Secretary bad ki Chairman ki ju shim ne pyndonkam da ki kali jong ki Department bapher bapher ba ki khmih bad dei namar kane ba ki iohlad ban kyntait ia ki kali ka SAD ban shu ioh klun ei beit beit da ka pisa jong u paidbah.

“Ki Minister, Parliamentary Secretary bad ki Chairman kim lah ban shim kali na ki Department ba ki khmih. Kane ka long kaba be-aiñ” ong u Naik haba jubab ia ka jingkylli bad ong ruh “kim don hok ban leh kumne naba ka SAD kala ai kali ia ki bad ia kiba kyntait, la ai bujli da ka pisa baiwai manla ka sngi”.

U Naik u pyntip ruh ba mynshembnai, ka Ophis u Accountant General ka Sorkar Kmie kala phah shithi sha ka Sorkar Jylla ba pan jingpynshai halor ka jingsiew tulop ia ki Chairman bad Vice Chairman jong ki Public Sector Undertaking na ka pla tyngka jong ka Secretariat Administration Department (SAD). U iathuh ba haduh mynta ka Sorkar kam pat lah ai jubab satia. U ong, ka dei ka jingshisha ba ki Chairman bad Vice Chairman jong ki Corporation kim lah ban shim tulop na SAD “Ki don la ki jong ki Tnad bad ki hap ban iaid hapoh ki kyndon ka Companies Act”. Ula ong, hooid kiba bun ki Corporation ki dei kiba ringswai hynrei ka dei ka Sorkar Jylla kaba hap mang tyngka ia ka tulop jong kine “Ka SAD ka dei kaba khmih tang ia ki kam ki jam hapoh ka Secretariat”. U pyntip, ki don kumba 10-15 tylli ki Corporation hapoh ka Jylla ba kynthup ia ka MTDC, MIDC, MEDC, MGCC, MTC bad kiwei kiwei.

 Web Site Designed and Maintained by SSNetCom Pvt. Ltd.