Monday September 6, 2010
Shillong Edition

By Our Reporter

Shillong, Rymphang : Kiwei kiwei ki MLA mar ia jop ki la shah pynkup burom, hynrei u Bah Ardent M.Ba saiawmoit, MLA Nongkrem u la ap haduh arsnem ban pdiang ia ka jingpynkup burom jong ki paidbah.

Kaei kadaw ba u Bah Ardent um shym la treh ban pynkup burom mar ia jop elekshon, kane kadei kaba u la pynpaw ha ka jingialang pynkup burom mynta ka sngi ba la pyllong da ka Nongkrem Pyllun Development Council (NPDC). “Nga la ong ia ki paidbah ba kam pat dei ka por ban pynkup burom ia nga mar ia jop elekshon, hynrei kidei ban peit shuwa ia ki kam jong nga bad haba ki la i biang ia ka jingtreikam ki lah ban leh burom ia nga. Ha kine ki arsnem, nga la pyrshang ban shakri hok ia ki paidbah ha baroh ki liang bad haba ki paidbah ki kwah ban pynkup burom haba ki la iohi ia ki kam jong nga, ngam kwah ban pynsngewsih ia ki. Kawei ruh nga ju iohi haba haba pynkup burom mar ia jop elekshon, kadei tang ka jingshongshit elekshon bad tang hadien shi bnai arbnai pat la shah kynthoh bad ka jingpynkup burom ka long kamkai noh. Ha nga hi ka jingjied ki paidbah kum u nongmih khmat, ka la dei lypa ka jingpynkup burom kaba khraw tam”.

Ha kane ka jingialang pynkup burom, u Dr. Bajubon Roy Kharlukhi, nongialeh hill state bad MP barim ka jylla, u la long u Kongsan ha kaba u la pynkup ia u bah Ardent da ka ryndia bad pynspong da ka ryndia tlem.

Haba kren ha kane ka sngi, u Dr. Bajubon, u la iaksaid bha ha Parliament ban ioh jingithuh ia ka ktien Khasi ha ka riti synshar jong ka ri India, u la ong ba haba u jied ua u nongmihkhmat, u don ki mawser bad u sawar ba u da thew bad kine ki jingthew jong u ki long ban peit ba u briew ba u jied, udei ban long u briew uba lah ban ioh ia ka jingshaniah, nangta u briew uba sngewthuh ia la ka jong ka kamram kum u nongmih khmat, u briew uba sngew thuh ia ka jingkitkhlieh ba udei ban pyndep bad kaba kongsan eh ka long ba udei ban long u briew u bym riej ban kren ia ka jingshisha lane u briew uba don ka jingshlur kaba na shapoh.

“Naduh ba dep ka elekshon MLA 2008, nga la buddien ia ki kam jong ki MLA baroh bad haba la khot ia nga ban don ha kane ka jingialang pynkup burom ia u Bah Ardent Basaiawmoit, nga la sngew shlur ban wan, namar ha u, nga iohi ia ka ryngieng jong u nong mihkhmat uba ba dap shynrang”, la ong u Dr. Kharlukhi.

Shuh shuh u la ong ba u Bah Ardent udei u nongmih khmat uba kwah ban wanrah ia ka jingsynshar kaba hok bad kaba shisha bad udei u nongmihkhmat uba iohi jngai.

Ha kane ka jingialang la ioh ruh ia ka jingkren na u bah Carmel Sohtun MDC Laitkroh, Kong Barisuk Khriam Nongsaid aiñ, Bah Kynsai M. Syiem, bad kiwei kiwei kiba la pynpaw ba kane ka sngi pynkup burom ia u MLA jong ki, kan iai long ka sngi ban sah jingkynmaw, namar ba ym tang ba ki la pynkup burom ia u kum u nongmihkhmat ka Nongkrem, hynrei la pynkup burom ruh ia u nongialam ba thymmai jong ka jaidbynriew.

Ia kane ka sngi la pynphuh pynphieng da ka drill na ki khynnah skul bad ka jingrwai na ki samla bad rangbah.

 Web Site Designed and Maintained by SSNetCom Pvt. Ltd.