|
Thursday November 26, 2009
|
|
Ym treikam byrthen mynder ka WKHSU, palat 500 kiew ki kali sha Shahlang
|
By Our Reporter
Nongstoiñ, Naiwieng : Ka jingbyrthen pynher krad mynder da ki seng na West Khasi Hills khamtam ka seng West Khasi Hill Student’s Union (WKHSU) kam shym treikam satia namar kumba ka la paw ba ka jingbyrngem ka shu kut tang ha ka jingsawa ka tynghung ba la teh ha ka por ba long jingialang.
Ia kane la lah ban sakhi mynta ka sngi ha kaba palat san spah tylli ki trok bar jylla naduh Bihar , U.P bad kiwei kiwei ki la hiar biang sha ki krem dewiong jong katei ka thaiñ. Ha kitei ki kali la kit ruh ia ki nongtrei bylla ki nongrung krem bar jylla suda kynthup ia ki khar Nepali, ki Boro, ki Behari bad kiwei kiwei. La ioh lum khubor ruh ba mynta ka kynti ka jingwan poi ki bar jylla ka la nang khambun shah bad palat ia kaba ki ju don.
Lah ban kdew biang hangne ba ki seng na Assam ki la khang noh ia ki kali baroh kiba wan kit dewiong na Shahlang namar ka jingpyntieng kohtympan jong ki sengbhalang na katei ka District, hynrei hynne ka sngi la pyllait noh namar ba la iohi ba ka jingbyrngem pynher mynder jong ki seng kam shym don jingktah ei ei ia ka iaid ka ieng lane ka kamai kajih jong ki. Kumta hynne ka sngi la pynkut noh ia ka jingkhang surok bad nalor ki kali ba wan kit dewiong, ki kali ba wan kit mar bam mar dih sha katei ka thaiñ ruh la pyllait lang noh.
Na ka liang ki katto katne ki Malik dewiong trai jylla khamtam kito kiba sah ram kali, ki la bynniaw ia kane ka jingwan kiew biang jong ki dkhar namar kin ym lah ban siew dep kham kloi. Hynrei yn leh kumno kiba bun na ki par dewiong kiba don ha Shahlang ki dei kiba la long hok long trai da ki bar jylla suda namar ki la siew sha ki trai jaka da ka dor kaba heh.
Copyright mawphor.com
|
