Friday September 3, 2010
Shillong Edition

By Osarly Wahlang

Nongstoin, Naiwieng : Ki nongbylla kiba dei ki bar Jylla kiba trei ha ki Kwari kum ha Tarajak, Kasrai, Nirang, Riangud, Riangna, Riangmaw bad ki jaka ba marjan ha ka jinmgiakren markhmat bad u nongai khubor, ki la ong ba ngin ym lah ban mih da lei lei na kane ka jaka bylla namar ngi la trei la bun bun snem bad ym shym don mano mano ba pynwit hynrei mynta pat ka shu long kyrkieh kyrkieh khlem sngewthuh. Lada ngin mih ruh da ei ngin bam haba ngi wan na ki jaka ba jngai.

Kine ki bar jylla kiba la ioh ban iakynduh ki long ki khar Nepali, ki Boro bad kiwei lait noh ki Muslim kiba la dep mih naduh 9 tarik ter ter haduh 12 tarik kata kumba shi hajar tam. Hynrei kiba dang sah haduh mynta ki dang don palat shi hajar ngut ha kitei ki jaka. Haba kylli pat na ki trai par ki la iathuh ba ngi la hap buh da ki dkhar namar ki Khasi ki dawa dor rem palat katba ki dkhar ki trei ha ka dor kaba tad bha. Ki la iathuh ruh katto katne na ki Malik ba ki don kiba la dep ban pynbiang ia ki kot ki sla kum ki Labour ha Nongstoin. Ki don pat kiba la shu trei la ka trei khlem kot khlem sla bad kren kopia ruh ba la da beh ruh kin ym khih. Hangne ka paw shai ruh ba ki Malik kwari ki iada ia ki.

Ki don ki nongshong shnong na kitei ki thain khamtam eh ki khynnah samla ki la ai ka jingiaroh ia ki sengbhalang kiba pyntreikam ia ka jingthmu kata ban ym shah ia ki bar Jylla khlem da tip ki dei na kano ka jaka. Ki la ai nuksa ruh ba ka la jia shisien ha Tarajak da ki nongtrei dewiong ba ki leh mynleh ha ka dur ki lehnoh bad ki la ioh kurup na kawei ka longkmie (Kong K.Riangshiang) palat lai lak tyngka katba ka dang thmu ban wanphai sha iing kaba la jia ha u snem ba la dep. Ki pulit ki la ioh ban kem ia ki tei ki briew na Guwahati. Namarkane ka daw bun ki nongshong shnong katei ka thain ki kubur ba dei ban weng noh ia ki bar jylla la da kim biang ki kot ka sla.

Na ka liang ki Muslim hadien ba ki la ioh jingtip ia kane ka jingkhih ki sengbhalang ki la mih lut na ki kwari ban leit phai sha Assam lyngba ka hokum u khlieh duh ki Muslim ba shong ha Assam bad ha ka jingialang kaba heh kaba la long ha Goalpara District ha ka 10 tarik mynta u Bnai ki la rai da kawei ka jingmut ban strike lut ia ki trok Assam kiba wan kit dewiong na Shahlang. Ia kane ka kam la rai ban pyntreikam naduh ka 15 tarik mynta u Bnai bad la tah ruh ia ki poster ha baroh kawei ka thain Shahlang bad ha ki trok bad kynroh ha shilynter lynti.

Haba pyrshang ban tih bniah, la lap ba ki heh saipan Muslim ki la bei tyngka da ki klur ha ki kwari dewiong ha baroh kitei ki jaka ba la kdew haneng, bad ka la ktah shisha Ia ki namar wat tang ia ki trok Assam kim shah shuh ban rung sha poh khlaw ban kit ia ki dewiong jong ki. La shah pat tang ia ki trok Khasi bad kaba ithamula ha kine ha ki sngi ki khynnah samla na kitei ki thain ki la ia ioh kali trok mar kawei kawei ban pynrung ha ki khlaw. Ym lah ban tip pat la kitei ki dkhar kin ai duh ne ki shu rieh tngen. Lehse ka jingthmu beh dkhar jong ki sengbhalang ka shu kut tang ha ki ktien bad jinghylla ha iew Shahlang, hynrei ban leit rung ha kitei ki jaka ba la shong da ki Nepali, Boro bad Hindu kan long kaba shitom.

 Web Site Designed and Maintained by SSNetCom Pvt. Ltd.