Friday September 3, 2010
Shillong Edition

By Our Reporter

Shillong, Jylliew: La bun snem, ki nongpyniaid jong ka Chillibreeze Solution Pvt. Ltd ki la don ka jingangnud ban ai sngewbha ia ka imlang ka sahlang ha kaba kane jingangnud ne ka jingphohsniew kaba la wan urlong, ha kaba ki nongthoh bad ki nongdro dur ki jong kane hi ka office ki lah lah ban pynmih ia kane ka kot comic ban ialap paidbah kumno ban iada na ka jingpang Khieshoh (Malaria) ha ka ri baroh kawei.

Ia kane ka kot la jer kyrteng da ka "A Tale of Two Magic Potions" ba la pynwan dur kum ka kot comic. Kane ka kot ka la don jingthmu ban pynsaphriang kylleng ka ri India shaphang ka jingiada ia ka jingpang khiehshoh, khamtam ha ki thaiñ shatei lam mihngi, ha kaba kane ka jingpang ka kynrei bha.

Kane ka dei ka sien ba nyngkong duh ha kaba pynmih ia ki jingiada lyngba ki kot ban pynphriang ia ka jingtip shaphang kane ka jingpang kaba ai jinghikai ia ki khynnah kiba leit skul, kaba pynsngewtynnad bad kumjuh ruh kaba pynbyrngia ban pule. Ka Chillibreeze ka la sdang ia ka jingpynphriang ia ka jingiada ia ka jingpang Malaria da kaba leit ai sngewbha ne sam ia kine ki kot komik ha ki khynnah skul ba shong Klas Five sha ki lai tylli ki skul ha sor Shillong, Meghalaya ha kaba kane ka Kompani ka don ia ka office treikam jong ka. Ban kham pynsngewtynnad bad ban tip ba kane ka kot ka long kaba iarap, ki nongtrei jong kane ka kompani ki la leit ban sam ia ki kot bad ki jingkylli jong ki jingkyntip ryngkat bad ki buskit sha ki skul bapher bapher ha kylleng ka sor Shillong.

Ki nongtrei jong ka Chillibreeze shuwa ba kin leit sha ki skul ki da pan jingbit shuwa na ki nongpyniaid jong ka skul bad ki ai jingkren ia ki khynnah skul da kaba ong ba ynda ki la dep ban pule ia kine ki kot komik kan don ka jingkyntip. Kiba jop ia ka jingkyntip ha ki skul kin ioh ia ki buskit ryngkat bad ki certificate na ka Chillibreeze.

Ka jingsam ia ki jingkylli jingkyntip ka long khyndiat sngi hadien ba ki la dep ban sam ia ki kot komik sha ki khynnah skul. Lyngba kine ki jingkylli ha ki jingkyntip ka pyni shisha ba ki khynnah ki shim khia bad bun na ki mynta ki la kham shai shaphang ka jingpang Malaria.

Kum ban shu pynpaw ba ka Dr. Nishi Viswanathan kawei na ki nongpyniaid jong kane ka kompeni Chillibreeze.com ka la ong ba "kane ka jingpynmih na kane ka kot kadei ka sien jam kaba nyngkong bad kan dang iai iaid shaphang kat dang mih ki sngi." Ka la ong "watla ka dei ka jingpang kaba dang lah ban pynkoit hynrei dang bun pat ki briew kiba iap na kane ka jingpang." Hooid ka jingsam ia ki musari ka dei kaba bha hynrei ka jingdon ia ka jingstad ne ka jingtip shaphang ka jingpang ka long kaba kham kongsan. Watla ka jingleh ne ka jingsdang jong ngi ka long kaba rit hynrei ka jingkyrmen jong ngi ka long ba wat i shi jaw i um in pynlong ia ka duriaw bah" la ong ka Dr. Viswanathan, kaba dei ka doctor ha kajuh ka por ka nongthoh jong kane ka kot.

Ka Chillibreeze ka don ia ka jingkyrmen ba lada don kiwei kiwei ki seng kiba kwah ban iasnoh kti lang ne ban iatrei lang ha kaba pynpriang ia kane ka jingnang jingtip, ka long kaba kloi ban pdiang, khnang ban pyniar ia ka jingpynphriang ia kane ka kam ba ki la sdang. Kumjuh ruh shen kan sa pynmih ia kane ka kot ha ki ktien bapher bapher ba kin lah ban sam ia shibun ki skul kiba don ha ka ri India baroh kawei. Na ka bynta kiba kwah ban bei tyngka bad ban sam ia kane ka Kot Malaria lah ban pyntip sha info@chillibreeze.com.

 Web Site Designed and Maintained by SSNetCom Pvt. Ltd.