Friday September 3, 2010
Shillong Edition

By Reporter

Ha kine ki sngi, kham iar eh ban ioh sngew ba ki riew shimet kin ai ei ia ki jingdon jingem jong ki sha ki paidbah nongshong shnong. Hynrei na ka liang jong ki khun ki kti jong ka Kong Lumtimai Kharkongor (bala khlad noh) kiba shong ba sah ha Mawlai Umjaiur ki la ai ei ia ka jaka jong ki sha ka Shnong Mawlai Kynton Massar.

Katkum u kyrwoh ba la pyllait da u Bah R Sawian, Rangbah Shnong ka shnong Mawlai Kyntoi Massar u la iathuh ba ka jingai jong ki khun ki kti jong ka Kong Lumtimai Kharkongor ia katei ka jaka sha ka shnong, ka long ban pyndep ia ka jingangnud jong ka kmie jong ki.

Katei ka jaka ka dei kaba don hapoh ka Mawlai Kyn ton Massar Block C, kawei na ka bynta ka Raid ne Lumjingtep Shnong kaba don kumba 26690 sq. feet, kawei na ka bynta ka Pung Um kaba don kumba 5600 sq. ft., ka footpath ban leit sha Umshyngiar Umkhlaw bad ka surok kali na Block C sha Block A.

Kumta na ka liang jong ka Executive Committee ryngkat bad ka Seng Samla ha ka 9 tarik mynta ubnai, kum ka dak ka jingsngewnguh ia kane ka jingleh sbun jong ki kala buh ia u Mawsahnam ha kane ka Raid Shnong bad kala pynthymmai ia ki Dulir jaka jong ki bad na ka liang ki khun ki kti jong i Kong Lumtimai kila aiti ia kane ka jaka jong ki sha ka shnong ryngkat bad ki kot ki sla kiba pynshisha ba kine ki jaka kiba kila ai ha kane ka sngi kin long noh ki hok nongkynti jong ka shnong.

Shuh shuh ha kane ka sngi, na ka liang jong u Rangbah Shnong u Bah R Sawian u la pynpaw ia ka jingsngewnguh kaba khraw ia ki khun ki kti jong i Kong Lumtimai kiba da ka jingsbun mynsiem bad ka jingthrang ban pynurlong ia ka jingangnud I kmie jong ki, kila kloi ban aiti ia katei ka jaka jong ki sha ka shnong kaba long ka jingkyrkhu kaba khraw ia ka shnong bad ia ki nongshong shnong hi baroh kawei.

 Web Site Designed and Maintained by SSNetCom Pvt. Ltd.